Hafa áttað sig á atburðarásinni

Lögreglan á höfuðborgarsvæðinu hefur áttað sig nokkurn veginn á atburðarás hópslagsmála í miðbæ Reykjavíkur í lok ágúst. Faraldur kórónuveirunnar og áhrif hans á samfélagið hafa þó tafið fyrir rannsókn málsins.

Talsvert var fjallað um hópslagsmálin, sem rannsökuð hafa verið sem tvær líkamsárásir, í fjölmiðlum. Slagsmálin brutust út neðst á Laugavegi laugardagskvöldið 29. ágúst síðastliðið. Lögregla hefur sagt ýmislegt benda til þess að tveir hópar hafi komið þar saman.

Ólík sjónarhorn stríðandi hópa

Annar hópurinn virðist hafa verið skipaður karlmönnum að uppruna úr karabíska hafinu en hinn Albanir sem sumir hverjir hafa starfað við dyravörslu í miðbænum. Margir úr báðum hópum hafa verið búsettir á Íslandi í lengri tíma.

Ólík sjónarhorn aðila málsins hafa komið fram í fjölmiðlum. Þannig hefur maður sem slasaðist í annarri árásinni haldið því fram að Albanahópurinn hefði áður ráðist á hann og hann kært þá fyrir líkamsárás. Árásin í lok ágúst hefði snerist um að hann drægi kæruna til baka, auk þess sem hann taldi það eiga hlut að máli að hann væri dökkur á hörund. Einn Albananna sem tók þátt í slagsmálunum hefur hins vegar hafnað því að þeir hafi átt upptök að slagsmálunum. 

Vísir fjallaði ítarlega um málið í september. Umfjöllunina má sjá hér fyrir neðan.

Fjórir eru enn með stöðu sakbornings og ekki hefur því orðið breyting þar á síðan í september. Margeir Sveinsson aðstoðaryfirlögregluþjónn hjá miðlægri rannsóknardeild lögreglu á höfuðborgarsvæðinu segir í samtali við Vísi að ekki hafi farið fram frekari skýrslutökur á sakborningum.

Hann segir málið enn í rannsókn og verið sé að reyna að ná utan um það. Þannig standi enn yfir gagnaöflun, einkum úr öryggismyndavélum á svæðinu, auk þess sem rætt hefur verið við vitni.

Inntur eftir því hvort komið sé í ljós hvað sé satt og rétt í frásögn málsaðila, og hvort atburðarásin liggi skýrt fyrir, segir Margeir svo vera.

„Já, við erum alveg að átta okkur á þessu. En ég ætla ekki að fara út í það neitt frekar eins og staðan er núna.“

Kórónuveirufaraldurinn og áhrif hans á samfélagið hafi tafið rannsókn málsins.

„Þetta er rosalega eltingarleikur við það að fá fólk til að koma og standa við uppgefinn tíma. Það er allur gangur á þessu. Og svo náttúrulega þetta ástand í þjóðfélaginu, þetta tefur allt saman,“ segir Margeir.

Hér að neðan má horfa á viðtal við Sigrúnu Helgu Lund, tölfræðing hjá Íslenskri erfðagreiningu, sem varð vitni að slagsmálunum laugardagskvöldið í ágúst. Hún flýtti sér út af barnum þar sem hún sat og skakkaði leikinn.