Fátt virðist geta komið í veg fyrir verk­föll Eflingar­fólks í borginni

Fátt virðist geta komið í veg fyrir verkföll Eflingarfólks í borginni í næstu viku. Þúsund leikskólastarfsmenn munu leggja niður störf strax á þriðjudag sem mun hafa mikil áhrif á leikskóla borgarinnar. Munu einhverjir þeirra að líkindum þurfa að loka vegna manneklu.

Samninganefndir Eflingar og Reykjavíkurborgar komu saman til fundar hjá ríkissáttasemjara klukkan 10 í dag. Í samtali við Morgunblaðið sagðist Sólveig Anna Jónsdóttir, formaður Eflingar, gera ráð fyrir að þetta yrði síðasti fundur samninganefndanna fyrir verkfall Eflingarfólks í borginni, sem hefst á þriðjudag, en áður hafði Sólveig sagst ekki ætla að funda með fulltrúum Reykjavíkurborgar oftar en lög kveða á um.

Verkfallshrina strax eftir helgi

Verði deila Eflingar og borgarinnar ekki til lykta leidd í dag hefst verkfallshrina strax eftir helgi. Eflingarfólk á leikskólum, hjúkrunarheimilum og í heimaþjónustu leggur þannig niður störf í hádeginu á þriðjudag og allan fimmtudaginn 6. febrúar.

Hópur leikskólastjórnenda fundaði í morgun með fulltrúum Reykjavíkurborgar þar sem væntanleg áhrif af verkfallinu á starfsemi leikskóla borgarinnar voru útlistuð.

Að óbreyttu munu þúsund leikskólastarfsmenn leggja niður störf á þriðjudag sem mun hafa mismikil áhrif á milli leikskóla og ræst það af hlutfalli Eflingarfólks á hverjum stað.

Eitthvert rask verði þó á öllum leikskólum og sumum þurfi jafnvel að loka.

Skertur vistunartími

Guðrún Jóna Thorarensen leikskólastjóri sat fundinn í morgun.

„Kjarninn í þessu er þessi: Hversu mörg börn geta komið á leikskólann? Og líka þau börn sem koma á leikskólann… Það getur verið skertur vistunartími hjá þeim af því að það getur verið að við eigum í vandræðum með að opna leikskólann og loka leikskólanum því að það eru margir Eflingarstarfsmenn sem sjá um að opna skólana og loka þeim líka. Þannig að það getur verið erfitt að vera með þjónustu í báða enda.

Eflingarstarfsmenn sem vinna í eldhúsinu… Ef eldhúsið lokar, þá þurfa börnin að fara heim í hádeginu að borða,“ segir Guðrún Jóna

Búið að semja um viðlíka hækkanir

Nýjasta útspil Eflingar í kjaradeilunni er yfirlýsing sem félagið sendi frá sér í morgun þar sem það sagði hið opinbera þegar hafa samið um viðlíka hækkanir og Eflingar fer fram á deilu sinni við borgina. Það hafi ríkið gert með samningum sínum við félög innan BHM, sem hafi falið í sér hækkanir umfram hina flötu krónutöluhækkun í svokölluðum Lífskjarasamningi.

Þórunn Sveinbjarnardóttir, formaður BHM, vildi ekki tjá sig um yfirlýsinguna og vísaði á Braga Skúlason, formann Fræðagarðs, félags sem átti aðild að umræddum samningi. Hann gat ekki orðið við viðtalsbeiðni fyrir hádegisfréttir.