Sportpakkinn: „Hræðilegur sóknarleikur“ KR og tap í spennuleik í Seljaskóla

Íslandsmeistarar KR töpuðu sínum fyrsta leik í Domino´s deild karla í vetur í gærkvöldi þegar liðið heimsótti ÍR-inga í uppgjöri liðanna sem spiluðu til úrslita um Íslandsmeistaratitilinn.

ÍR vann leikinn 78-77 og gerði það sem liðinu tókst ekki í lokaúrslitunum í fyrra sem var að vinna heimaleik á móti KR. KR tryggði sér titilinn eftir sigur í oddaleik í Vesturbænum.

Arnar Björnsson setti saman frétt um leik ÍR og KR í gærkvöldi.

„Sóknarleikurinn var bara hræðilegur“, sagði KR-ingurinn Matthías Orri Sigurðarson eftir tap Íslandsmeistara KR í Hellinum í Breiðholtinu í gærkvöldi.

„Bæði lið spiluðu góðan varnarleik en við bara „chokuðum“ í fjórða leikhluta.  Matthías Orri lék með ÍR í úrslitarimmunni við KR á síðustu leiktíð þegar KR vann Íslandsmeistaratitilinn.  „Við vorum bara illa stemmdir og þetta var bara ljótur leikur“.

Borche Ilievski þjálfari ÍR vildi vinna leikinn „Við áttum tækifæri að verða fyrstir til að vinna KR og það eitt og sér átti að vera nóg til að kveikja í mínum mönnum.  Bara nafnið KR á að duga til að „mótivera“ öll lið þar á meðal mitt lið.  Við gáfum allt í leikinn og ég sagði mínum mönnum að ef munurinn yrði lítill ættum við möguleika á að vinna. Þú veist að við töpum ekki þeim leikjum“, sagði kampakátur þjálfari ÍR.

Liðin sem börðust um Íslandsmeistaratitilinn á síðustu leiktíð, KR og ÍR, tókust á í Breiðholtinu.  KR var með frumkvæðið og um miðjan annan leikhlutann munaði 12 stigum á mununum.  ÍR minnkaði muninn í þrjú stig, KR var yfir í hálfleik 36-33.

Georgi Boyanov var stigahæstur í ÍR-liðinu, hitti úr þremur af fjórum þriggja stiga skotum sínum og skoraði alls 26 stig og fiskaði 6 villur á KR-inga.  ÍR byrjaði seinni hálfleikinn betur og snemma í lokafjórðungunum voru Breiðhyltingar með fjögurra stiga forystu.

Jakob Örn Sigurðarson var stigahæstur KR-inga með 20 stig og hann jafnaði metin í 64-64.

KR-ingar náðu undirtökunum og  eftir þriggja stiga körfu Jóns Arnórs Stefánssonar var KR með fimm stiga forystu (64-69) og fjórar mínútur eftir.  ÍR svaraði og Bojonov skoraði úr tveimur vítaskotum þegar mínúta var eftir.  Evan Christopher Singletary kom ÍR í 76-73 og 20 sekúndur til leiksloka.

KR-ingar tóku leikhlé og Jakob minnkaði muninn í eitt stig.  KR-ingar brutu og Florijan Jovanov skoraði úr báðum vítaskotum sínum.  KR náði ekki þriggja stiga skoti til að jafna metin, Michael Craion minnkaði muninn í eitt stig á lokasekúndunum, ÍR vann 78-77.

Það má sjá alla fréttina hér fyrir neðan.