Gripinn við skemmdarverk á bílastæði lögreglu

Maður var handtekinn seint á fjórða tímanum í nótt í porti lögreglustöðvarinnar við Hverfisgötu, þar sem hann hafði unnið skemmdarverk á lögreglubíl. Ekki eru gefnar frekari upplýsingar um málið í dagbók lögreglu.

Þá handtók lögregla mann fyrir að reyna að „villa á sér heimildir og gefa upp rangt nafn.“ Málið er í rannsókn. Ekkert er frekar gefið upp um málið í dagbók lögreglu utan þess að maðurinn er erlendur.

Maður var handtekinn fyrir meint kynferðisbrot um klukkan hálf tólf í gærkvöldi. Málið er í rannsókn.

Þá komu upp tvö þjófnaðarmál á níunda tímanum í gærkvöldi. Fyrst var tilkynnt um þjófnað á veski í miðbænum. Vitað er hver stal veskinu og málið er í rannsókn. Þá var kona handtekin fyrir þjófnað úr verslun úti á Granda. Hún var látin laus að lokinni skýrslutöku.