Getur alls ekki hugsað sér að Bergþór verði formaður

Björn Leví Gunnarsson segir að Bergþór Ólason, þingmann Miðflokksins, ekki hafa gengist við orðum sem hann lét falla á Klausturbar. Birni Leví hafi því runnið blóðið til skyldunnar að segja eitthvað í morgun þegar stefndi í að Bergþór yrði skipaður formaður umhverfis- og samgöngunefndar Alþingis.

Uppnám varð á fundinum þegar Björn Leví lagði til að Karl Gauti Hjaltason, þingmaður Miðflokksins, yrði skipaður formaður í stað Bergþórs. Fór svo að fundinum var frestað.

Lagði fram tillögu um Karl Gauta sem formann

Óhætt er að segja að deilur hafi staðið um formennsku Bergþórs í nefndinni vegna framgöngu hans í Klausturmálinu. Minnihlutinn hefur verið mótfallinn því að hann taki aftur við formennsku sem hann sagði sig frá eftir að upptökur af samtölum þingmanna Miðflokksins voru birtar á sínum tíma.

Fundur nefndarinnar hófst klukkan níu í morgun. Björn Leví er áheyrnarfulltrúi Pírata og segir fundinn hafa verið hálf undarlegan, og stuttan. Jón Gunnarsson, formaður nefndarinnar, hafi tilkynnt að til stæði að kjósa um formann. Raunar var það eina málið sem lá fyrir fundinum.

Allir nefndarmenn greiddu atkvæði með því að gengið yrði til kosninga. Í framhaldinu hafi Jón sagt að fyrir liggi tillaga um að Bergþór yrði formaður.

„Þá banka ég í borðið og bið um að tillaga verði sett fram í staðinn þess efnis að Karl Gauti verði formaður,“ segir Björn Leví. Alvanalegt sé að áheyrnarfulltrúi, sem hafi ekki atkvæðisrétt, setji fram tillögu og þeim sé komið áfram. Hanna Katrín Friðriksson, þingmaður Viðreisnar, hafi gert það og þá hafi Jón formaður beðið um fundarhlé.

Fór Jón afsíðis með fulltrúum meirihlutans í nefndinni, þeim Ara Trausta Guðmundssyni og Kolbeini Óttarssyni Proppé hjá VG, Líneik Önnu Sævarsdóttur úr Framsókn og Vilhjálmi Árnasyni úr Sjálfstæðisflokknum, og tveimur fulltrúum Miðflokksins í nefndinni. Þeim Bergþóri og Karli Gauta.

Eftir stutta stund hafi þau komið aftur inn í fundarsalinn en í framhaldinu aðeins meirihlutinn farið afsíðis á ný. Björn segir Jón svo hafa komið í salinn og sagt að fundi hafi verið fresta. Hann yrði boðaður síðar.

Virtist koma fólki á óvart

Björn Leví viðurkennir að fundurinn hafi farið öðruvísi en fólk átti von á.

„Þetta virtist eitthvað koma fólki á óvart,“ segir þingmaðurinn. Hann minnir á að samkomulag þingflokkanna um formennsku í nefndum snúi í þessu tilfelli að því að Miðflokkurinn sé með formennsku. Ekki Bergþór.

„Það er annar Miðflokksmaður í nefndinni og getur verið formaður án þess að það hafi áhrif á samkomulagið. Karl Gauti sagðist reyndar myndu hafna því en hann fékk ekki tækifæri til þess.“

Björn Leví er afdráttarlaus í þeirri skoðun sinni að Bergþór sé ekki hæfur til að gegna formennsku.

„Já, tvímælalaust. Miðað við aðstæður fannst mér eðlilegt að Bergþór myndi sleppa þessu. Útaf ummælum hans og afstöðu gagnvart konum sem kom fram á þessum upptökum.“

Gott dæmi um mikilvægi #metoo

Hann sé ósammála Brynjari Níelssyni að Bergþór hafi gengist við því sem hann sagði á upptökunum. Hann minnir á að allir þingmenn hafi tekið þátt í rakararáðstefnu á Alþingi í fyrra þar sem allir voru sammála um að breyta siðareglunum. Um ákveðið áhersluatriði hafi verið að ræða í kjölfar #metoo.

„Þetta var mjög gott dæmi um það af hverju #metoo var nauðsynlegt skref að taka,“ segir Björn Leví. Bagalagt hafi verið að fylgjast með þingmönnum Miðflokksins, þar á meðal Bergþór, kenna stóla- eða bremsuhljóðum um í stað þess að gangast við hegðun sinni afdráttarlaust.

Óvíst er hvenær fundað verður aftur um formennsku í nefndinni.