Krossfesting á öllum betri jólasýningum

Það kemur í raun okkur sjálfum á óvart að vera nú að halda þessa tónleikaröð í þriðja skiptið. Hugmyndin kviknaði sem algjört grín, að halda rapptónleika en hafa jólaplakat. Síðan þegar leið á grínið fórum við að taka þessu alltaf meira og meira alvarlega,“ segir Gauti Þeyr Másson, sem flestir þekkja sem Emmsjé Gauta.

Hann segir þá Frey Árnason, sem stendur að tónleikunum með honum, hafa smitast af einhverjum jólaanda.

„Þannig að það helltist yfir okkur einhver heilagur jólaandi. Það sama má segja um þau sem hafa tekið þátt í þessu með okkur, þau hafa öll smitast af einhverri jólagleði.“

Síbreytilegur jólasöngleikur

Tónleikarnir sprengdu af sé húsnæðið strax fyrsta árið, en þá voru þeir haldnir í Gamla bíói.

„Þá ætluðum við fyrst að halda bara eina sýningu en enduðum með sjö pakkaðar sýningar. Þannig að við áttuðum okkur fljótt á því að við þyrftum að færa og stækka við okkur. Á síðasta ári voru tónleikarnir því haldnir í Háskólabíói þar sem þeir verða aftur í ár.“

Gauti ítrekar að þetta sé ekki einungis hans sýning, heldur allra þeirra sem koma fram með honum og taka þátt.

„Við Freyr sjáum vissulega um þetta, en það er fyrst og fremst samspil þeirra listamanna sem koma fram sem gerir sýninguna frábæra. Á köflum er þetta meira eins og leiksýning eiginlega, mjög súr jólasöngleikur, þar sem handritið breytist jafnvel meðan sýningin er í gangi,“ segir Gauti.

Þótt hann segi sýninguna vera síbreytilega mælir Gauti ekki með því að fólk kaupi sér miða á alla tónleikana.

„Ef ég tek bara sem dæmi þá voru fyrstu tónleikarnir fyrir þremur árum allt öðruvísi en þeir sjöundu. Ég mæli samt gegn því að fólk kaupi miða á allar sýningarnar, það væri fjárhagslega mjög léleg ákvörðun og gæti sett heimilisbókhaldið gjörsamlega á hvolf. Ef þú kaupir miða aftur og aftur þá áttu við eitthvert vandamál að stríða,“ segir Gauti hlæjandi.

Leynigesturinn sprengir skalann

Hann mælir þó klárlega með því að fólk mæti allavega einu sinni, enda eru engir aukvisar sem koma fram á tónleikunum í ár.

„Aron Can og Salka Sól eru aftur með mér í ár, þau hafa verið með í öllum sýningum til þessa. En fyrir utan þau tvö reynum við að stokka þetta aðeins upp og gera eitthvað nýtt og öðruvísi. Ásamt þeim koma svo fram Ragga Gísla, Bríet, Páll Óskar og Friðrik Dór.“

Gauti segir að leynigesturinn eigi svo eftir að sprengja skalann, en honum sé stranglega bannað að gefa upp hver það sé í bili.

„Sýningin breytist mikið frá ári til árs, þú ert ekki að fara að borga þig inn á sömu tónleika og í fyrra. Sviðsetningin er önnur og við gefum ekki upp strax hvað gerist í ár, en í fyrra fæddist Jesúbarnið til dæmis og var að lokum krossfest. Eru ekki krossfestingar á öllum betri jólasýningum?“

Aldrei farið á jólatónleika

Hann segir þó líklegt að hinn heilagi andi láti sjá sig líkt og á síðasta ári.

„Þó ég segi sjálfur frá þá eru þetta skemmtilegustu jólatónleikar sem ég hef farið á. Ég hef reyndar aldrei farið á jólatónleika, þannig að ég er ekki með neitt sérstaklega gott viðmið. En við erum mikið að vinna með hugtakið „What would Bó do?“. Ef Bó er með hatt, þá er ég með hatt,“ segir Gauti.

Hann segir það mikilvægt að eiga fyrirmyndir í þessu sem og annars staðar, og þar sé Björgvin Halldórsson fremstur á meðal jafningja. Hann hafi fundið upp hjólið undir jólatónleikaleikunum.

„Og til hvers að finna upp hjólið aftur, þegar þú getur bara sett svartar felgur á það?“ segir Gauti .

Miðar á sýningarnar seldust hratt upp í fyrra, en hægt er að nálgast miða á tónleikana í ár á tix.is frá og með morgundeginum.