40 prósent niðursveifla í sölu nýrra bíla

Það sem af er ári hafa verið fluttir inn 9500 fólksbílar samanborið við 15700 á sama tíma í fyrra. Frá þessu er greint í Viðskiptablaðinu í dag. Samdrátturinn nemur tæplega 40 prósentum.

Tekið er fram að um er að ræða nýskráningar allra fólksbíla og því eru kaup fyrirtækja eins og bílaleiga einnig inni í tölunum.

Óðinn Valdimarsson, verkefnastjóri hjá Bílagreinasambandinu, segir að hafa verði í huga að síðustu þrjú ár séu á meðal fimm stærstu bílasöluárum sögunnar hér á landi.