Vínveitingaleyfið í hús sólarhring áður en hátíðin hefst

Tónlistarhátíðin Secret Solstice fékk vínveitingaleyfi í dag, sólarhring fyrir opnun hátíðarinnar. Tveir af helstu tónlistarmönnum helgarinnar forfölluðust en upplýsingafulltrúi hátíðarinnar segir að þrátt fyrir það gangi undirbúningur vel.

Tónlistarhátíðin Secret Solstice hefst á morgun og stendur yfir alla helgina. Hundrað og tuttugu listamenn hafa boðað komu sína í Laugardalinn og reiknað er með að um tíu til tólf þúsund manns sæki hátíðina.

Að sögn upplýsingafulltrúa hátíðarinnar hefur undirbúningur gengið vel, þó setti það strik í reikninginn þegar tveir af stærstu tónlistarmönnum hátíðarinnar forfölluðust.

„Það er það svo sannarlega. Venjulega tekur töluvert langan tíma að semja við listamenn, það þarf að undirbúa komu þeirra og undirbúa sviðið fyrir þá. Martin Garrix datt út fyrst. Hann ökklabraut sig og þurfti að fara í aðgerð og við leystum það með Jonas Blue. Það var aðeins erfiðara þegar Rita Ora datt út í fyrradag en við redduðum því og Pusha T rappari kemur hingað á morgun. Hann er tilnefndur til Grammy-verðlauna þannig við erum bara spennt að fá hann. Þetta er ekki auðveldasta vikan á skrifstofunni, síðustu dagar,“ segir Jón Bjarni Steinsson, upplýsingafulltrúi Secret Solstice.

Hátíðin fékk vínveitingaleyfi í dag, sólarhring fyrir hátíðina. Aðspurður hvers vegna leyfið væri svo seint að berast segir hann einfalda skýringu á því.

„Það er vegna þess að lögreglan og slökkviliðið þurfti að taka allt út hérna dagana fyrir áður en hægt var að veita leyfi. Þetta hefur gengið smurt, leyfið er komið og allir sáttir,“ sagði Jón Bjarni.

Borgarráð veitti jákvæða umsögn um vínveitingaleyfi Secret Solstice til 23:30 öll kvöld hátíðarinnar á fundi sínum í dag en hátíðin hafði sótt um vínveitingaleyfi til klukkan eitt eftir miðnætti umrædda daga. Þá veitti borgarráð einnig jákvæða umsögn um vínveitingaleyfi vegna hins svokallaða Secret Solstice Party sem fer fram á Hard Rock Café í Lækjargötu.

Kolbrún Baldursdóttir borgarfulltrúi Flokks fólksins lagði til styttingu á vínveitingaleyfi hátíðarinnar til klukkan 23 í stað 23:30 en tillagan var felld af meirihlutanum. Í bókun vísaði Kolbrún til þess að foreldrar í hverfinu séu kvíðnir fyrir hátíðinni í ljósi neikvæðra reynslu af hátíðinni frá því í fyrra.

Borgarráðsfulltrúar Samfylkingarinnar, Viðreisnar, Pírata og Vinstri grænna ítrekuðu í bókun sinni að hátíðin yrði haldin með breyttu sniði í ár þar sem tekið hefði verið tillit til umsagna frá m.a. foreldrafélögum í hverfinu.

Frítt er inn á hátíðina fyrir tólf ára og yngri í fylgd með foreldrum. Spáð er sól í Laugardalnum á morgun og opnar svæðið klukkan 16.