ISI ræður Kviku og Lex fyrir skráningu á aðalmarkað

Íslenska sjávarútvegsfyrirtækið Iceland Seafood International (ISI) hefur ráðið Kviku banka og lögmannsstofuna Lex sem ráðgjafa í tengslum við skráningu fyrirtækisins á aðalmarkað Kauphallarinnar.

Þetta kom fram í kynningu Bjarna Ármannssonar, forstjóra ISI, á aðalfundi félagsins í síðustu viku en hann tók við forstjórastarfinu í byrjun árs. Stjórn ISI ákvað í lok síðasta árs að hefja undirbúning að skráningu á aðalmarkað Kauphallar Íslands árið 2019 en það hefur verið skráð á First North markað síðan maí árið 2016.

Þá kemur fram í kynningunni að félagið stefni á að greiða árlega 20 til 40 prósent af hagnaði í arð til hluthafa og að stefnt verði að því að eiginfjárhlutfallið verði um 35 prósent innan þriggja ára.

ISI hagnaðist um 5,8 milljónir evra á síðasta ári samanborið við 2,7 milljónir á árinu 2017. Sala félagsins nam 346 milljónum og jókst um 39 prósent frá fyrra ári. Á árinu keypti ISI tvö félög, Oceanpath og Icelandic Iberica.–tfh