Spyr hvort forsendur fjármálaáætlunar séu brostnar

Ólafur Ísleifsson, þingmaður Miðflokksins, segir að þrátt fyrir að margt sé jákvætt í fjármálaáætlun ríkisstjórnarinnar sé hún engu að síður reist á forsendum sem gætu vel brostið.

„Áætlunin getur ekki verið betri en forsendurnar sem hún er reist á. Við erum að tala hérna um mjög veigamikla þætti sem, eins og sakir standa, eru í fullkominni óvissu, mjög veigamikla þætti,“ segir Ólafur og vísar til stöðu WOW air og kjaraviðræðna. Hann segir að bæði launaforsendur og verðlagsforsendur gætu brostið.

Ólafur og Bjarkey Olsen Gunnarsdóttir, þingmaður Vinstri grænna voru gestur í Bítinu í morgun og ræddu fjármálaáætlun ríkisstjórnarinnar sem var kynnt á laugardag. Gert er ráð fyrir auknum framlögum til samgöngu-og félagsmála en á móti er krafist aðhalds í launakostnaði og opinberum innkaupum.

Í ljósi þeirrar óvissu sem er uppi í kringum flugrekstur á Íslandi finnst Ólafi ábyrgast að fresta umræðum í þinginu um málið en fjármálaáætlun ríkisstjórnarinnar verður rædd í þinginu á morgun.

Ólafur segir að það sé ekki ljóst hvaða afleiðingar það muni hafa fyrir áætlunina og framkvæmd hennar ef illa fer. Þá vill hann vita á hvaða þjóðfélagshópum mögulegar aðhaldsaðgerðir munu bitna.

„Ég bara spyr mig. Umræðan [í þinginu] hlýtur, eins og málið liggur fyrir núna, að litast mjög af þessari óvissu og því að það hefur raunverulega ekki verið gerð grein fyrir því með neinum fullnægjandi hætti í áætluninni hvernig yrði brugðist við ef til að mynda það færi þannig í flugsamgöngum hérna að það yrði umtalsverð fækkun á farþegum til landsins.“

Áætlunin byggi á spám og geri ráð fyrir óvæntum útgjöldum

Bjarkey segir að ekki sé ástæða til þess að fresta umræðunni því fjármálaáætlun byggi á hinum ýmsu spám og geri ráð fyrir óvæntum útgjöldum.

„Þegar gerðar eru áætlanir hvort sem það er þessi áætlun eða einhver önnur í ríkisbúskapnum þá höfum við á ákveðnum spám að byggja. Það var dregið fram þegar fjárlaganefnd fundaði með fjármálaráðherra á laugardagsmorgun að það væru auðvitað uppi ákveðnir óvissuþættir þar á meðal WOW og það væru til einhverjar sviðsmyndir sem hefðu með þetta að gera,“ segir Bjarkey.

Hún segir að í áætluninni sé gert ráð fyrir umtalsverðum fjármunum í varasjóð og meiri fjármunum en áður hefur verið gert. Bjarkey segir að skellurinn yrði fyrst og fremst á þessu ári ef illa fer fyrir WOW air.

„Ég tel enga ástæðu til þess að ætla að við þurfum að fara hafa áhyggjur af því að skerða hér þjónustu - eins og sett hefur verið fram í fjölmiðlum - á þá sem veikast standa eða mest þurfa á að halda. Það er auðvitað ekki þar sem borið er fyrst niður. Það vitum við alveg. Það verður ekki gert.“

 

Krefst svara

Ólafur gefur ekki mikið fyrir svör Bjarkeyjar sem hann kallar óljósar fullyrðingar. Hann kallar eftir skýrari svörum.

„Við erum ekki bara að tala um aukin útgjöld í launamálum, við erum líka að tala um skertar tekjur ef það færi þannig að það yrði umtalsverður samdráttur og meiri en áður hefur verið gert varðandi til að mynda komu ferðamanna og við höfum haft miklar tekjur af þeirri grein. Hún er orðin burðarás og hefur staðið hér undir hagvextinum undanfarin ár.“