Engar upptökur og engin vitni að umtalaðri líkamsárás í Vestmannaeyjum

Kona sem varð fyrir líkamsárás að næturlagi í Vestmannaeyjum fyrir sumarið 2016 fær ekki að gefa skýrslu fyrir dómi í gegnum síma. Þetta er niðurstaða Landsréttar sem staðfesti úrskurð Héraðsdóms Suðurlands þess efnis.

24 ára karlmaður játaði við þingfestingu málsins í september annan ákæruliðinn. Í honum er honum gefið að sök að hafa slegið konuna einu höggi í andlit svo hún féll við fyrir framan veitingahúsið Lundann í Vestmannaeyjum. Hann neitar sök í hinum ákæruliðnum sem er öllu alvarlegri.

Þar segir að karlmaðurinn hafi skömmu eftir fyrri líkamsárásina veist aftur að konunni en nú með ítrekuðum höggum og spörkum í andlit og búk, klætt hana úr öllum fötunum og því næst yfirgefið hana þar sem hún lá nakin, mikið slösuð og án bjargar í götunni.

Konan birti mynd af sér á samfélagsmiðlum í kjölfar árásarinnar. Mátti þar sjá mikla áverka í andliti en í ákæru segir að hún hafi hlotið brot í gólfi hægri augntóftar, opinn skurð fyrir ofan vinstra auga sem sauma þurfti fimm spor, mar víða á andliti auk fleiri áverka á hnakka, brjósthrygg og rasskinn.

Man ekki hvers vegna hún var nakin

Héraðssaksóknari krafðist þess að konan fengi að gefa símaskýrslu í gegnum síma eða annað fjarskiptatæki enda sé hún búsett erlendis. Á því er byggt að konan hafi í skýrslutöku hjá lögreglu ekki sagt annað um árásarmanninn en að hann hafi verið dökkhærður og vísað til þess að um sé að ræða karlmann.

Hún muni eftir tveimur höggum en ekki meira fyrr en hún vaknaði á gjörgæsludeild í Reykjavík. Þá muni hún ekki hvernig hún hafi farið úr fötunum.

Komið hafi fram að konan hafi neitað að tjá sig um málið við matsmann. Vegna ómeðhöndlaðs og alvarlegs geðsjúkdóms þá sé konan ekki hæf til að gefa skýrslu fyrir dómi. Vegna þessa geti framburður konunnar ekki verið slík þungamiðja málsins að úrslit þess geti ráðist af framburði hennar.

„Vegna andlegra veikinda hennar yrði það brotaþola aukinheludr afar þungbært að koma til landsins til að gefa skýrslu fyrir dómi.“

Engar upptökur úr eftirlitsmyndavélum

Valið standi milli þess að hún gefi skýrslu í gegnum síma eða gefi hreinlega ekki skýrslu. Verjandi mannsins mótmælti þessari kröfu héraðssaksóknara.

Dómurinn komst að þeirri niðurstöðu að hafna kröfu héraðssaksóknara. Vísaði hann til þess að ekkert vitni segist hafa séð síðari árásina sem ákært er fyrir. Ekki liggi fyrir upptökur úr eftirlitsmyndavélum sem sýni nokkuð. Verði því að telja líklegt að niðurstaða málsins geti ráðist af munnlegum framburði fyrir dómi og mat á sönnunargildi slíks framburðar.

„Við þessar aðstæður hlýtur framburður brotaþola í líkamsárásarmáli að geta skipt verulegu máli við úrslausn máls og verður að leggja á það almennan mælikvarða, en ekki fyrst og fremst að lít til þess hvernig framburður brotaþola var við rannsókn lögreglu. Þrátt fyrir að framburður brotaþola hjá lögreglu hafi verið með þeim hætti sem að framan greinir þykir heldur ekki unnt að slá því að föstu að hann verði á sama hátt við aðalmeðferð.“

Aðalmeðferð málsins var fyrirhuguð í dag en hefur verið frestað.