Brá þegar hún fékk plastþræði í kaffisúkkulaði frá Góu

Láru Kristínu Brynjólfsdóttur segir það hafa verið heldur betur óskemmtilega lífsreynsla þegar hún hugðist gæða sér á Lindu kaffisúkkulaði frá Góu fyrir helgina. Þegar hún var hálfnuð með súkkulaðistykkið uppgötvaði hún að inn í því leyndust plastþræðir. Framleiðslustjóri Góu segir plastið hættulaust, um einangrað tilfelli sé að ræða en ef fleiri tilfelli komi upp verði varan innkölluð.

„Ég var með þetta fast í tönnunum og hálsinum og þá fattaði ég að þetta væri ekki alveg eðlilegt,“ segir Lára í samtali við Vísi. Lára tók myndir af plastþráðunum sem Lára segir að hafi verið falinn sem Lára keypti í verslun í Reykjavík. Hefur hún trú á því að hún hafi borðað eitthvað af plastþráðunum.

„Ég fékk algjört sjokk og ég varð hrædd þar sem þetta var í hálsinum á mér. Ég er eftir mig eftir þetta vegna þess að nú pæli ég hvort það sé eitthvað inn í súkkulaði þegar ég er að borða það,“ segir Lára sem segir að þræðirnir hafi verið fleiri en hún henti súkkulaðinu um leið enda gat hún ekki hugsað sér að klára það eftir að hafa uppgötvað aðskotahlutinn.

Ósátt með skýringar

Þá er hún nokkuð ósátt við viðbrögð Góu vegna málsins. Var hún beðin um að koma með plastþræðina til þeirra og gerði hún það á mánudaginn. Þar var hún leyst út með konfektkassa, bingókúlupakka og súkkulaðistykki. Lára segist hins vegar ekki hafa haft mikinn áhuga á því að borða súkkulaði eftir að hafa uppgötvað plastþræðina í kaffisúkkulaðinu.

Hjá Góu var henni sagt að málið yrði skoðað og haft yrði samband við hana fljótlega. Lára segist hafa viljað að Góa gripi til einhverra aðgerða vegna málsins enda gæti það reynst hættulegt leynist slíkir plastþræðir í fleiri súkkulaðistykkjum. Lára segist hafa fengið skilaboð frá Góu í morgun þess efnis að ekki væri vitað hvað það væri sem leynst hafi í súkkulaðinu.

Þegar hún tjáði viðkomandi hins vegar að hún sætti sig ekki við þær skýringar og ætlaði með málið lengra kom annað hljóð í strokkinn.

Þá hafi hún fengið þær upplýsingar að vitað væri hvað hefði leynst í súkkulaðistykkinu og framleiðslustjóri Góu hefði hug á því að tala við hana. Enn hefur hún þó ekkert heyrt frá Góu vegna málsins. Þá segir Lára að Heilbrigðiseftirlit Hafnarfjarðar- og Kópavogssvæðis, sem sér um einnig Garðabæ þar sem verksmiðja Góu er staðsett, hafi haft samband við sig og vilji skoða málið.

Aldrei þurft að innkalla vöru

Jóhann Ögri Elvarsson, framleiðslustjóri hjá Góu, segir málið eiga sér eðlilegar skýringar. Hann harmar þó atvikið.

„Mér þykir mjög leitt að þetta hafi skeð,“ segir Jóhann Ögri og segir það afar sjaldgæft að fyrirtækið fái kvartanir. Þá hafi Góa aldrei þurft að innkalla vöru.

Jóhann útskýrir að við athugun á búnaðinum í framleiðslusalnum, eftir að kvörtunin barst, hafi komið í ljós að um var að ræða hár úr litlum burstum sem notaðir eru til að bursta af bökkunum sem fyllingunni er sprautuð í. Ein festingin í burstanum sem heludr búnti af stuttum plasthárum hafði losnað og farið í fyllinguna. Fyllingin er svo sprautuð í mótin við mikinn hita og þess vegna rúllast plasthárin upp.

Framleiðslustjórinn segir að um einangrað tilfelli sé að ræða. Komi upp fleiri tilfelli verði varan innkölluð.

Þá bendir Jóhann á að Góa sé með málmleitartæki á öllum vörum. Plast geti þó sloppið í gegn. Þetta plast sé hvítt, líkt og fyllingin, og því erfitt að greina. Verið sé að skipta hvítu plasthárunum út fyrir blá svo þau sjáist betur. Þá fari þeir reglulega yfir allan framleiðslubúnað.

„Þetta er ekkert hættulegt fyrir mannslíkamann að fá svona. Bara eins og mjög stuttur tannþráður,“ segir Jóhann. Hann skilji þó vel að Lára hafi kúgast þegar hún borðaði stykkið.

Þau svör fengust hjá heilbrigðiseftirlitinu að því hefði borist tilkynning vegna málsins sem væri komið í farveg hjá eftirlitinu.