Bein útsending: Verkefnum á sviði samfélagslegrar nýsköpunar ýtt úr vör

Lokahóf Snjallræðis, fyrsta hraðalsins fyrir samfélagslega nýsköpun, fer fram í Listasafni Reykjavíkur, Hafnarhúsinu, klukkan þrjú í dag. Streymt verður beint frá hófinu.

Snjallræðisteymin kynna verkefnin sem þau hafa unnið að undanfarnar sjö vikur í samstarfi við öflugan hóp mentora og helstu sérfræðinga landsins á sviði samfélagslegrar nýsköpunar.

Hörður Arnarson, forstjóri Landsvirkjunar, flytur erindi. Líf Magneudóttir, borgarfulltrúi, veitir teymunum viðurkenningar. Kynnir er Magnús Þór Torfason, lektor við Viðskiptafræðideild Háskóla Íslands.

Um hraðalinn:

Þann 10. október hóf fyrsti íslenski hraðallinn fyrir samfélagslega nýsköpun, Snjallræði, göngu sína. Hraðlinum er ætlað að stuðla að fjölbreyttari nýsköpun hér á landi og skapa vettvang fyrir aukið samfélagslegt frumkvöðlastarf.

Alls bárust 40 umsóknir í Snjallræði þetta árið og þau verkefni sem báru sigur úr bítum eru afar fjölbreytt, virkilega metnaðarfull og leita lausna við ólíkum samfélagslegum áskorunum.

Sjö framúrskarandi verkefni á sviði samfélagslegrar frumkvöðlastarfsemi voru valin til þátttöku og hafa undanfarnar sjö vikur unnið að þróun þeirra á frumkvöðlasetri Skapandi greina við Hlemm. Á sjö vikna tímabili, í október og nóvember, nutu þátttakendurnir stuðnings við að þróa hugmyndina áfram og koma henni í framkvæmd, ásamt þjálfun frá fremstu sérfræðingum Íslands á sviði samfélagslegrar nýsköpunar.

Að hraðlinum standa Höfði friðarsetur Reykjavíkurborgar og Háskóla Íslands og Nýsköpunarmiðstöð Íslands.