Sigurður Einarsson furðar sig á ummælum Geirs H. Haarde

Sigurður Einarsson, fyrrverandi stjórnarformaður Kaupþings, furðar sig á orðum Geirs H. Haarde, fyrrverandi forsætisráðherra, varðandi það að hann hafi verið blekktur til að lána Kaupþingi 500 milljóna evra lán.

Þetta var haft eftir Geir í upprifjunarþætti Ríkissjónvarpins um Hrunið í viðtali við Einar Þorsteinsson. Þetta hefur vakið upp spurningar, svo sem þá: Hvert fóru peningarnir? Styrmir Gunnarsson, fyrrverandi ritstjóri Morgunblaðsins, er meðal þeirra sem spyr þeirrar spurningar og gerði það í Silfrinu í gær.

Ég get svo sem ekki mikið verið að tjá mig um upplifun GHH fyrir 10 árum síðan. Það hljóta samt að teljast mikil öfugmæli telji hann sig blekktan af mér eða öðrum frá Kaupþingi

segir Sigurður í samtali við Vísi.

Kaupþingsmenn telja sig blekkta, ekki öfugt

Hann vísar í því efni til greinar Hreiðars Más Sigurðssonar, fyrrverandi forstjóra í Kaupþingi, sem birtist Fréttablaðinu 17. október 2014. Þar segir segir meðal annars:

„Þegar Seðlabankinn tilkynnti okkur um ákvörðun sína að lána okkur 500 milljónir evra og millifærði fjárhæðina til Kaupþings mánudaginn 6. október 2008 töldum við, stjórnendur Kaupþings, að það yrði nægilega stór fyrirgreiðsla til að gera okkur kleift að standa af okkur þann storm sem geisaði á fjármálamörkuðum á þeim tíma. Það sem við vissum ekki þá var að ríkisstjórn Íslands myndi síðar þann dag beita sér fyrir samþykkt neyðarlaga á Alþingi Íslendinga,“ skrifar Heiðar Már.

Sigurður vekur jafnframt athygli á því þar sem segir að neyðarlögin, sem settu innistæðueigendur fram fyrir aðra kröfuhafa, kipptu fótunum endanlega undan rekstri alþjóðlegra banka á Íslandi og eftir að þau voru samþykkt seint um kvöldið er óumdeilt að mínu viti að ekki var lengur raunhæft að reka alþjóðlegan banka, sem sótti fjármögnun sína til alþjóðlegra markaða, frá Íslandi.“

Segir engan Kaupþingsmann hafa hagnast um krónu á láninu

Sigurður segist ekki hafa meira um þetta að segja. Þegar hann er spurður hvað hafi orðið um peningana, bendir hann blaðamanni Vísis á að lesa grein Heiðars Más. Og þar segir að enginn starfsmaður Kaupþings hafi hagnast um svo mikið sem eina krónu á þessu láni.

„Ekkert af fjármagninu sem Kaupþing fékk frá Seðlabanka Íslands var notað til kaupa á eigin skuldabréfum Kaupþings eins og haldið hefur verið fram. Allt fjármagnið var nýtt til að tryggja aðgang viðskiptavina bankans í fjölmörgum löndum Evrópu að bankainnistæðum sínum, tryggja aðgang dótturbanka Kaupþings í Evrópu að lausafé og mæta veðköllum bankans vegna fjármögnunar hans og viðskiptavina hans á verðbréfum hjá alþjóðlegum bönkum í Evrópu. Með öðrum orðum þá var allt féð notað til að tryggja sem frekast var kostur rekstur og hag Kaupþings og viðskiptavina bankans.“

Þetta mál hefur verið til umfjöllunar í fjölmiðlum, og tengist hinu svokallaða CLN-máli en aðalmeðferð í því fór fram haustið 2015. Vísir gerði grein fyrir því þá sem og Kjarninn. En, málinu var svo endanlega vísað frá núna í haust.