Ungi drengurinn heill á húfi

Tíu ára drengur sem lögreglan á höfuðborgarsvæðinu lýsti eftir í dag fannst heill á húfi skömmu eftir klukkan 15, að sögn Ásgeirs Þórs Ásgeirssonar, yfirlögregluþjóns hjá lögreglunni á höfuðborgarsvæðinu.

Drengsins hafði verið saknað síðan klukkan 9 í morgun er hann lét sig hverfa úr Árbæjarlaug. Fjölmennt lið björgunarsveitarfólks hvaðanæva á höfuðborgarsvæðinu var kallað út til að aðstoða lögreglu á höfuðborgarsvæðinu við leitina.

Lögreglumaður á bifhjóli fann drenginn við Grjótháls í grennd við húsnæði Ölgerðarinnar og Össurs á fjórða tímanum. Á sama tíma hóf að rigna inn tilkynningum til lögreglu frá fólki sem lesið hafði um hvarf drengsins á samfélags- og fréttamiðlum. Ásgeir segir því ljóst að drengurinn hefði fundist afar fljótt hefði lögreglumaðurinn ekki komið á auga á hann.

Að sögn Ásgeirs var líðan drengsins góð þegar hann fannst. Honum verður nú komið í hendur foreldra sinna.

Fréttin var uppfærð klukkan 15:37.