Sex vilja setjast í formannsstól

Sex gefa kost á sér í formannskjöri hjá Neytendasamtökunum. Framboðsfrestur rann út á miðnætti í gær. Ný forysta verður kosin á þingi samtakanna í október.

Í framboði eru Ásthildur Lóa Þórsdóttir, formaður Hagsmunasamtaka heimilanna, Breki Karlsson, forstöðumaður Stofnunar um fjármálalæsi, Guðmundur Hörður Guðmundsson, fyrrverandi formaður Landverndar, Guðjón Sigurbjartsson viðskiptafræðingur, Jakob S. Jónsson, leiðsögumaður og leikari, og Rán Reynisdóttir hársnyrtimeistari.

Neytendasamtökin hafa verið án formanns frá því Ólafur Arnarson sagði af sér formennsku 10. júlí í fyrra eftir stutta og stormasama formannstíð. Lög félagsins gera ekki ráð fyrir frávikum frá hefðbundnu formannskjöri á þingi félagsins sem haldið er á tveggja ára fresti.