Leita að Reykvíkingi ársins

Borgarstjórinn í Reykjavík óskar í áttunda sinn eftir ábendingum frá borgarbúum um Reykvíking sem verið hefur öðrum til fyrirmyndar. Ábendingarnar verða notaðar til að velja Reykvíking ársins.

Til greina koma aðeins einstaklingar, sem hafa verið til fyrirmyndar eða sýnt af sér háttsemi eða atferli sem kemur Reykjavíkurborg til góða á einhvern hátt að því er segir í tilkynningu frá borginni.

„Slíkur borgari gæti t.d. verið einhver sem heldur borginni hreinni, eða einhver, sem hefur haft jákvæð áhrif á nærumhverfi sitt eða hefur gert Reykjavíkurborg gott á undanförnum árum með einhverjum öðrum hætti en án þess þó að fá greitt fyrir störf sín.“

Anna Sif Jónsdóttir, formaður foreldrafélags Breiðholtsskóla, var Reykvíkingur ársins í fyrra og renndi af því tilefni fyrir fyrsta laxinum í Elliðaánum.

„Það eru fjölmargir fyrirmyndarborgarar sem vinna óeigingjarnt starf í þágu samborgara sinna á degi hverjum með því að halda borginni snyrtilegri og fallegri eða vinna gott starf í þágu síns hverfis. Reykvíkingar sem vita af slíkum einstaklingum sem þeir telja að væru vel að þessum heiðri komnir eru hvattir til að senda inn tilnefningu, “ Dagur B. Eggertsson borgarstjóri.

Ábendingar um einstaklinga eru vel þegnar og ber að senda þær inn ásamt rökstuðningi um það hvers vegna viðkomandi einstaklingur á heiðurinn skilinn á netfangið hugmynd@reykjavik.is eða bréflega til skrifstofu borgarstjóra merkt Reykvíkingur ársins fyrir föstudaginn 15. júní 2018.

Þriggja manna dómnefnd velur Reykvíking ársins úr innsendum tillögum.