Meta bréf Vodafone yfir markaðsvirði

Hagfræðideild Landsbankans metur gengi hlutabréfa í Vodafone á 77,8 krónur á hlut, sem er ríflega 10 prósentum yfir skráðu gengi bréfanna eftir lokun markaða í gær, samkvæmt nýlegu verðmati sem Fréttablaðið hefur undir höndum. Sérfræðingar bankans telja enn óvissu ríkja um möguleg samlegðaráhrif vegna kaupa Vodafone á eignum og rekstri 365 miðla.

Í verðmati hagfræðideildarinnar er því spáð að rekstrartekjur Vodafone verði 20,1 milljarður króna á þessu ári. Er það nokkur lækkun frá spánni í síðasta verðmati í desember á síðasta ári. Ástæðan, að sögn sérfræðinga Landsbankans, er sú að þeir töldu að sameining áðurnefndra félaga myndi ganga hraðar fyrir sig en raunin hefur verið.

Fullra áhrifa samrunans eigi að taka að gæta á næstu átta til fjórtán mánuðum, að því er segir í verðmatinu, og telja Landsbankamenn líklegt að það gerist á seinni enda bilsins. Þrátt fyrir óvissuna vegna samrunans er gert ráð fyrir því í verðmatinu að áætlanir stjórnenda Vodafone gangi í stórum dráttum eftir.

Að mati hagfræðideildarinnar verður EBITDA félagsins – rekstrarhagnaður fyrir afskriftir, fjármagnsliði og skatta – 4,3 milljarðar á þessu ári og 5,1 milljarður árið 2020. Til samanburðar gera stjórnendurnir ráð fyrir að EBITDA verði 4 til 4,4 milljarðar í ár og 5 milljarðar árið 2020.





Vodafone er systurfélag Vísis en félagið Sýn á bæði Vísi og Vodafone.