Haukur hættur hjá SFS og fer til GAMMA

Haukur Þór Hauksson, sem hefur verið aðstoðarframkvæmdastjóri Samtaka fyrirtækja í sjávarútvegi (SFS) undanfarin þrjú ár, hefur hætt þar störfum og mun taka til starfa hjá fjármálafyrirtækinu GAMMA Capital Management, samkvæmt upplýsingum Markaðarins.

Haukur, sem hefur setið í stjórn GAMMA síðastliðin ár, var ráðinn aðstoðarframkvæmdastjóri SFS í lok maí árið 2014. Þar áður hafði hann um árabil gegnt starfi framkvæmdastjóra afleiðu­sviðs slitabús Kaupþings en á árunum 2004 til 2008 starfaði Haukur sem sérfræðingur í gjaldeyris- og afleiðumiðlun hjá Kaupþingi banka.

GAMMA hefur að undanförnu aukið talsvert umsvif sín, meðal annars með opnun skrifstofu í London, og þá vinnur félagið að því að hefja starfsemi í New York og Zürich síðar á árinu. Hagnaður GAMMA á síðasta ári nam 846 milljónum og tvöfaldaðist frá fyrra ári. Eignir í stýringu voru rúmlega 115 milljarðar í lok síðasta árs.

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.