Spáir glimrandi grillveðri á laugardag

Helgin er handan við hornið og því ekki úr vegi að líta til veðurs. Samkvæmt veðurfræðingi á Veðurstofu Íslands mun lægja smám saman í dag og léttir til um landið sunnanvert. Fremur svalt fyrir norað ne milt syðra.

Í nótt og á morgun léttir einnig til um landið norðanvert. Víða verður fínasta veður á morgun þótt að sums staðar geti þokan verið til ama við ströndina. Eins verða hitatölurnar á uppleið og útlitið um helgina með vænsta móti eftir fremur kalda daga.

Veðurhorfur á landinu næstu daga:

Á morgun:

Fremur hæg breytileg átt á morgun og víða léttskýjað, en sums staðar þokuloft við vesturströndina. Hiti 3 til 13 stig í dag, mildast syðst, en 7 til 15 á morgun.

Á laugardag:

Breytileg átt 3-8 m/s. Léttskýjað um mest allt land en líkur á þokubökkum austast. Hiti 7 til 17 stig, hlýjast suðvestantil, en svalast við A-ströndina.

Á sunnudag:

Austan og norðaustan 3-13 m/s, hvassast með suðurströndinni. Bjart N- og V-til, en annars skýjað og úrkomulítið. Hiti breytist lítið.

Á mánudag og þriðjudag:

Hæg austlæg eða breytileg átt. Skýjað við N- og A-ströndina, en annars bjartviðri. Milt í veðri.

Á miðvikudag:

Hæg vestlæg eða breytileg átt og skýjað með köflum. Áfram milt.