NBA: Ástleysið háði ekki LeBron James og félögum á Valentínusardaginn | Myndbönd

Cleveland Cavaliers vann sigur á Minnesota Timberwolves í NBA-deildinni í körfubolta í nótt þrátt fyrir að vera án eins af mönnunum sem voru valdir í Stjörnuleikinn sem fram fer um næstu helgi. Vandræðagemlingurinn DeMarcus Cousins sýndi mátt sinn gegn Lakers og Chicago Bulls er allt annað og betra lið með Jimmy Butler innanborðs.

LeBron James var með 25 stig, 14 stoðsendingar og 8 fráköst þegar Cleveland Cavaliers vann 116-108 útisigur á Minnesota Timberwolves. Kevin Love verður ekki með Cleveland Cavaliers næstu vikurnar vegna hnémeiðsla. Channing Frye kom inn í byrjunarliðið fyrir hann og endaði með 21 stig og 10 fráköst.

Kyre Irving skoraði 25 stig og gaf 7 stoðsendingar og Tristan Thompson var með 14 stig og 11 fráköst. Nýi maðurinn Derrick Williams kom síðan með 13 stig inn af bekknum.

Cleveland fékk Kevin Love í skiptum fyrir Andrew Wiggins og Wiggins var með 41 stig á móti liðinu sem valdi hann í nýliðavalinu en vildi ekki nota hann. Karl-Anthony Towns skoraði síðan 26 stig. Ricky Rubio gaf 16 stoðsendingar og tók 8 fráköst en skoraði bara 5 stig.

Doug McDermott var með 20 stig þegar Chicago Bulls vann 105-94 sigur á Toronto Raptors. Jimmy Butler kom aftur inn í Chicago liðið eftir meiðsli og það munaði svo sannarlega um 19 stig og 12 stoðsendingar frá honum.

Þetta var ellefti sigur Chicago í röð á móti Toronto en Raptors hefur ekki fagnað sigri í leikjum liðanna síðan 31. desember 2013.

Kyle Lowry skoraði 22 stig fyrir Toronto Raptors og DeMar DeRozan var með 18 stig. DeRozan var tíu stigum undir meðaltali sínu og var síðan hent út úr húsi á lokamínútu leiksins.

DeMarcus Cousins skoraði 40 stig og tók 12 fráköst þegar Sacramento Kings vann 97-96 útisigur á Los Angeles Lakers. Lakers-liðið vann upp þrettán stiga mun í fjórða leikhlutanum en náði ekki að stoppa Cousins sem skoraði tíu síðustu stig síns liðs.

Lou Williams kom með 29 stig inn af bekknum fyrir Lakers en klikkaði á lokaskoti leiksins sem hefði tryggt liði hans sigur.

Úrslitin í NBA-deildinni í nótt:

Los Angeles Lakers - Sacramento Kings    96-97    

Chicago Bulls - Toronto Raptors    105-94    

Minnesota Timberwolves - Cleveland Cavaliers    108-116