Gagnrýna viðbrögð við úrskurði kjararáðs: „Alþingi skortir jarðsamband og tengsl við almenning í landinu“

Elín Björg Jónsdóttir, formaður BSRB, segir að ákvörðun forsætisnefndar Alþingis um að lækka starfstengdar greiðslur til þingmanna mæti ekki gagnrýni stéttarfélagsins á úrskurð kjararáðs frá því október síðastliðnum en þá hækkaði þingfararkaup um tæp 45 prósent. Þá segir miðstjórn ASÍ í ályktun að forsætisnefnd Alþingis hafa fallið á fyrstu prófraun sinni „og sýnt að Alþingi skortir jarðsamband og tengsl við almenning í landinu.“

BSRB gagnrýndi hækkun kjararáðs harðlega enda telur félagið að hún sé úr öllum takti við launaþróun annarra hópa í samfélaginu, hvort sem er á opinberum vinnumarkaði eða þeim almenna. Elín Björg segir að gagnrýni BSRB sé ekki mæti með ákvörðun forsætisnefndar enda séu starfstengdu greiðslurnar til viðbótar við þá tug prósenta hækkun sem kjararáð úrskurðaði um.

Ógagnsæjar starfstengdar greiðslur

Elín Björg segir að greiðslurnar hafi verið ógagnsæjar og verði það áfram.

„Þingið er líka að greiða sérstaklega fyrir formennsku og varaformennsku í nefndum. Ríkið er ekki að greiða nefndarfólki sem starfar fyrir ríkið nefndarlaun, allavega það sem við þekkjum til, þannig að þarna enn einu sinni eru þingmenn að fá greiðslur með einhverjum allt öðrum hætti heldur en gert er almennt á vinnumarkaði og því erum við auðvitað að mótmæla,“ segir Elín Björg.

Í umfjöllun um málið á vef BSRB segir að afar varhugavert sé ef kjararáð eigi að vera leiðandi í launahækkunum en sé niðurstaðan þessi „er ljóst að leiðin hefur verið mörkuð og annað launafólk mun sækja sambærilegar launahækkanir. Það er ekki verkefni verkalýðshreyfingarinnar einnar að tryggja stöðugleika á vinnumarkaði og dapurlegt að stjórnvöld og Alþingi neiti að taka ábyrgð með því að snúa ákvörðun kjararáðs.“

Eðlilegt að einfalda launakjör þingmanna

Þegar ákvörðun forsætisnefndar um að lækka starfstengdu greiðslurnar var kynnt í vikunni sagði Unnur Brá Konráðsdóttir, forseti Alþingis, að skipaður yrði starfshópur sem myndi endurskoða lögin um þingfararkaup og þingfararkostnað.

BSRB segir að ef þinginu sé alvara með því að endurskoða lögin þá hljóti „að koma til álita einfalda launakjör þingmanna verulega og fella út megnið af þeim starfstengdu greiðslum sem þeir fá í dag. Eðlilegra væri að þingmenn geti fengið útlagðan kostnað endurgreiddan gegn framvísun kvittana, og að upplýsingar um slíkar greiðslur séu opinberar og öllum kjósendum aðgengilegar.“

Mótmæla hálfkáki forsætisnefndar

Ályktun miðstjórnar ASÍ má svo sjá hér að neðan:

Miðstjórn Alþýðusambands Íslands telur forsætisnefnd Alþingis hafa fallið á fyrstu prófraun sinni og sýnt að Alþingi skortir jarðsamband og tengsl við almenning í landinu. Sl. haust ofbauð landsmönnum ákvörðun kjararáðs um fordæmalausa hækkun launa og fastra greiðslna til alþingismanna. Síðan þá er búið að skipta um helming þingmanna og snérust kosningarnar í haust ekki síst um breytt siðferði.

Nýir þingmenn höfðu tækifæri til að beita sér og sýna í verki að alvara lá að baki kosningaloforðum og taka til baka hækkun þingfaralauna umfram það sem hinn almenni launamaður hefur fengið í sitt umslag.

Miðstjórn Alþýðusambandsins mótmælir hálfkáki forsætisnefndar þingsins og krefst þess að Alþingi taki málið upp og afturkalli hækkanir kjararáðs. Miðstjórn ASÍ minnir á að forsenduákvæði kjarasamninga eru til endurskoðunar nú í febrúar og hækkanir til alþingismanna og æðstu embættismanna geta sett framhald kjarasamninga alls þorra landsmanna í uppnám.