Gylfi aðstoðar Benedikt áfram

Gylfi Ólafsson hefur verið ráðinn aðstoðarmaður Benedikts Jóhannessonar, nýs fjármála- og efnahagsráðherra.

Gylfi er 33 ára heilsuhagfræðingur og var oddviti Viðreisnar í alþingiskosningunum sem fram fóru í október, en náði ekki kjöri. Að kosningum loknum réð Benedikt Gylfa sem aðstoðarmann sinn, en samkvæmt reglum Alþingis geta formenn flokka ráðið sér aðstoðarmann. 

Gylfi lauk B.Ed. gráðu sem grunnskólakennari frá Háskólanum á Akureyri, M.Sc. í hagfræði frá Stokkhólmsháskóla og lagði stund á doktorsnám í heilsuhagfræði við Karolinska í Stokkhólmi frá 2013, að því er segir í frétt ráðuneytisins um ráðninguna. 

„Frá árinu 2013 hefur Gylfi verið sjálfstætt starfandi ráðgjafi í heilsuhagfræði á Íslandi. Hann hefur verið stundakennari við Háskóla Íslands frá 2014. Árin 2012-2016 var Gylfi ráðgjafi í heilsuhagfræði hjá Quantify Research í Stokkhólmi. Hann stofnaði og rak nýsköpunarfyrirtækið Vía í skordýraeldi í Bolungarvík frá 2013-2016. Gylfi var dagskrárgerðarmaður og fréttamaður hjá RÚV 2009-2013.“

Gylfi er giftur Tinnu Ólafsdóttur og saman eiga þau eina dóttur.