El Chapo framseldur til Bandaríkjanna

Fíkniefnabaróninn Joaquin „El Chapo“ Guzman hefur verið framseldur frá Mexíkó til Bandaríkjanna. Sex mismunandi embætti í Bandaríkjunum vilja rétta fyrir honum fyrir fíkniefnasmygl og aðra glæpi. Hann var framseldur eftir að hæstiréttur Mexíkó og áfrýjunarréttur höfnuðu beiðni hans um að hann yrði ekki framseldur.

Árið 2015 tókst Guzman að flýja úr fangelsi í Mexíkó í gegnum göng sem höfðu verið grafin undir það. Göngin voru rúmlega eins og hálfs kílómetra löng og búið var að koma mótorhjóli þar fyrir svo Guzman gæti verið fljótur þar í gegn.

Hann var svo handsamaður hálfu ári seinna í mjög frægri handtöku, sem minnti helst á hasarmynd. Skömmu áður en hann var handtekinn hafði leikarinn Sean Penn ferðast til frumskóga Mexíkó til að taka viðtal við Guzman sem birtist í Rolling Stone.

Samkvæmt NBC News liggur ekki fyrir hvar Í Bandaríkjunum Guzman verður fyrst leiddur fyrir dómara.