Endanleg skýrsla um Borgun er væntanleg

Von er á endanlegri skýrslu Ríkisendurskoðunar um Borgunarmálið öðrum hvorum megin við helgina. Verið er að leggja lokahönd á skýrsluna og venja er að málsaðilar fái einn til tvo daga til að lesa slíkar skýrslur yfir áður en þær eru birtar opinberlega.

Drög einstakra kafla skýrslunnar voru send út fyrir um mánuði. Morgunblaðið birti í gær frétt upp úr drögunum. Samkvæmt fréttinni viðurkenndi Steinþór Pálsson, bankastjóri Landsbankans, á fundi með ríkisendurskoðun að líklega hefði bankinn gleymt að spyrja forsvarsmenn Borgunar um eignarhlutinn og að ekki hefðu verið skoðuð gögn í öðru af tveimur gagnaherbergjum sem útbúin voru vegna sölunnar.

Fulltrúar bankasýslunnar, Borgunar og Landsbankans vildu ekki tjá sig um fréttir af drögum skýrslunnar. Viðmælendur blaðsins sögðust allir vilja bíða endanlegrar skýrslu með að tjá sig þar sem oft yrðu verulegar breytingar í vinnsluferli slíkra skýrslna. 

Fréttin birtist fyrst í Fréttablaðinu