Ginobili áfram hjá San Antonio þótt Duncan sé hættur

Samkvæmt bandarískum fjölmiðlum hefur argentínski körfuboltamaðurinn Manu Ginóbili skrifað undir nýjan samning við San Antonio Spurs.

Samningurinn er til eins árs og gefur Ginóbili 14 milljónir dala í aðra hönd.

Ginóbili hefur leikið með San Antonio allan sinn feril í NBA en næsta tímabil verður hans fimmtánda með Texas-liðinu.

Ginóbili, Tony Parker og Tim Duncan mynduðu kjarnann í San Antonio-liðinu um langt árabil en sá síðarnefndi tilkynnti fyrr í vikunni að hann hefði lagt skóna á hilluna eftir 19 ára farsælan feril í NBA.

Ginóbili hefur fjórum sinnum orðið NBA-meistari með San Antonio, síðast árið 2014.

Hann var valinn besti sjötti leikmaður NBA-deildarinnar 2008 en það ár var hann einnig valinn í þriðja úrvalslið deildarinnar.