Durant efstur á óskalista Warriors

Golden State Warriors náði ekki að verja titil sinn í NBA-deildinni eftir tap í oddaleik gegn Cleveland Cavaliers.

Liðið ætlar að vinna bikarinn aftur og er þegar farið að leggja grunn að því að styrkja liðið. Samkvæmt heimildum ESPN er Kevin Durant, leikmaður Oklahoma, efstur á óskalista Warriors.

Durant kemur á leikmannamarkaðinn þann 1. júlí næstkomandi og verður hart bitist um hann.

Leikmaðurinn gæti vel haldið áfram að spila fyrir Oklahoma en honum verður frjálst að semja við önnur félög.

Bæði Warriors og San Antonio hafa mikinn áhuga á að semja við Durant. Skiljanlega þar sem hann er frábær leikmaður og einn sá besti í deildinni.

Durant mun ekki ætla að ræða við mörg félög. Aðeins félög þar sem hann telur sig eiga möguleika á að vinna meistaratitilinn.