Love ætlar að spila áfram með Cleveland

Kevin Love, leikmaður Cleveland, þarf að horfa frá hliðarlínunni á félaga sína keppa um NBA-meistaratitilinn.

Love hafði aldrei á ferlinum komist í úrslitakeppnina fyrr en nú. Hann meiddist aftur á móti í fyrstu umferð úrslitakeppninnar og spilar ekki aftur fyrr en á næstu leiktíð.

Mikið hefur verið rætt og ritað um framtíð Love en hann getur fengið sig lausan frá félaginu í sumar. Var talað um að hann færi þá til New York eða Los Angeles.

„Ég býst við því að vera klár í fyrsta leik á næstu leiktíð og þá í búningi Cleveland," sagði Love í sínu fyrsta viðtali eftir meiðslin.