Garnett skallaði Howard

Það sauð upp úr í leik Brooklyn Nets og Houston Rockets í NBA-deildinni í nótt.

Þá skallaði Kevin Garnett, leikmaður Nets, Dwight Howard strax í fyrsta leikhluta.

Þeir byrjuðu á að ýta hver öðrum en svo brjálaðist Garnett, kastaði boltanum í Howard og skallaði hann svo. Í kjölfarið ýtti hann Howard frá sér en Howard svaraði með því að slá Garnett í hnakkann.

Garnett var rekinn úr húsi og fékk ekki að hitta fjölmiðlamenn eftir leikinn.

Howard vildi ekkert tala um slagsmálin eftir leikinn sem Houston vann.