Melo hótaði að lemja liðsfélaga

Mórallinn í herbúðum NY Knicks er ekki upp á marga fiska eftir lélegustu byrjun í sögu félagsins.

Knicks hefur aðeins unnið fjóra leiki í vetur en tapað tuttugu. Knicks hefur þess utan tapað tíu leikjum í röð.

Leikmenn eru sagðir óánægðir með þríhyrningssóknina sem er runnin undan rifjum forseta félagsins, Phil Jackson. Leikmenn segja sóknarleikinn vera fyrirsjáanlegan og vilja prófa eitthvað nýtt.

Svo er líka pressa á stjörnu liðsins, Carmelo Anthony, en liðsfélagar hans saka hann um að skjóta of mikið, gefa helst ekki boltann og vera óstöðugan í varnarleik sínum.

Upp úr sauð síðan á milli Melo og Tim Hardaway Jr. á dögunum er hinn óreyndi Hardaway öskraði á Melo að taka frákast. Það kunni stjarnan ekki að meta.

Hann hellti sér yfir Hardaway á leiðinni fram völlinn. Spurði hvort hann vissi við hvern hann væri að tala? Í kjölfarið hótaði hann síðan að lemja Hardaway inn í klefa eftir leik. Toppmórall.