Kupchak: Væntingarnar eru að vinna titilinn

Mitch Kupchak framkvæmdarstjóri Los Angeles Lakers í NBA körfuboltanum í Bandaríkjunum segir væntingar liðsins háar en heilsa leikmanna hefur þar mikið að segja.

„Okkar væntingar eru að vinna titilinn,“ sagði Kupchak. „Væntingarnar fyrir utan þetta herbergi eru kannski ekki þær sömu,“ bætti hann við.

„Það eru allir heilir þessa stundina. Ég hef fylgst vel með Kobe (Bryant) í allt sumar og hann lítur vel út. Hann segir að sér líði mjög vel. Steve Nash segir að það sé langt síðan hann hafi verið í eins góðu formi.“

Lakers vann aðeins 27 leiki á síðustu leiktíð og tapaði 55 en liðið átti við mikil meiðsli að stríða á síðustu leiktíð.

Hvort heilir Kobe Bryant og Steve Nash séu nóg fyrir Lakers til að snúa lélegu gengi á síðustu leiktíð sér í vil er stóra spurningin en rétt rúmur mánuður er þar til NBA deildarkeppnin hefst.