Stríðni Shaq endar í réttarsalnum

Shaquille O'Neal, einn besti miðherji NBA-deildarinnar fyrr og síðar, er óhræddur við að gera grín að bæði sér og öðrum en nú hefur þessi fjórfaldi NBA-meistari gengið of langt því maður einn frá Michigan hefur höfðað skaðabótamál gegn honum og tveimur öðrum.

Shaq gerði grín að veikindum mannsins þegar hann tók af sér sjálfsmynd síðasta sumar. Umræddur maður sem heitir Jahmel Binion, tók af sér mynd, sem Shaq gerði síðan grín af á bæði twitter og Instagram.

Jahmel Binion er með sjaldgæfan erfðasjúkdóm sem hefur mikil áhrif á útlit hans. Hann á í erfiðleikum með að losa svita, hann hefur takmarkaðan hárvöxt og þá vantar í hann tennur.

Binion höfðaði mál gegn Shaquille O'Neal og tveimur öðrum mönnum og heimtar 25 þúsund dollara í skaðabætur sem eru um 2,9 milljónir íslenskra króna.

Shaquille O'Neal er þó búinn að biðja manninn afsökunar en það gerði miðherjinn í apríl síðastliðnum eftir að hann frétti af veikindum Binion.