LeBron vill stærsta samning sem mögulega má bjóða honum

LeBron James verður laus allra mála frá Miami Heat í dag þegar markaðurinn með samningslausa leikmenn hefst í NBA-deildinni í körfubolta. Hann ætlar sér að fara aðra leið núna en þegar hann var laus undan samningi hjá Cleveland árið 2010.

Lið sem hafa samband við James verður sagt að hann vilji ekkert minna en stærsta samning sem mögulega má bjóða honum, að því fram kemur í frétt ESPN.

LeBron tók á sig launalækkun þegar hann gekk í raðir Miami fyrir fjórum árum, en hann fékk 19 milljónir dala fyrir síðasta tímabil hjá Heat.

Það lið sem semur við LeBron núna þarf að greiða honum um 20,7 milljónir dala á fyrsta ári en samningar í NBA-deildinni hækka með hverju ári og gæti hann því endað nær 30 milljónum fyrir hvert ár líkt og núverandi samningur KobeBryants.

LeBron mun ekki hitta nein lið að þessu sinni líkt og hann gerði fyrir „ákvörðunina“ fyrir fjórum árum. Þess í stað mun umboðsmaður hans, Rich Paul, ræða við þau lið sem hafa áhuga á að fá besta körfuboltamann heims í sínar raðir.

LeBron hefur aldrei verið hæstlaunaði leikmaðurinn í sínu liði á ellefu ára ferli í NBA-deildinni. Svo virðist þó sem að hann sé ekki lengur tilbúinn til að fá lægri laun og styrkja liðið í kringum sig. Sú ábyrgð gæti nú fallið á liðsfélaga hans; DwayneWade og Chris Bosh. Það er ef LeBron heldur tryggð við Miami Heat.

Sjö lið eru það langt undir launaþakinu í dag að þau geti boðið leikmanninum þessar 20,7 milljónir dala á fyrsta ári. Það eru Miami Heat, Dallas Mavericks, Los Angeles Lakers, Phoenix Suns, Utah Jazz, Philadelphia 76ers og Orlando Magic.