Wade og Haslem fylgdu í fótspor James

Dwyane Wade og Udonis Haslem hafa nýtt sér uppsagnarákvæði í samningi sínum við Miami Heat og fylgja þar með í fótspor LeBron James.

Þetta var staðfest í gær en talið er líklegt að Chris Bosh muni gera slíkt hið sama en hann hefur frest til að nýta sér ákvæðið í sínum samningi til morguns.

Spekingum vestanhafs þykir líklegt að James, Wade og Bosh, sem hittust á dögunum til að ræða framtíð sína, hafi valið að fara þessa leið til að geta samið um laun sín upp á nýtt og gefa félaginu þannig svigrúm undir launaþakinu til að bæta enn einni stórstjörnunni í leikmannahópinn.

Udonis Haslem, leikmaður Miami og góðvinur Wade, er einnig búinn að segja upp sínum samningi en þessi þrítugi kappi hefur verið hjá Heat í tólf ár, einu ári lengur en Wade. Saman hafa þeir unnið þrjá meistaratitla með Heat.