Byssan sem banaði Steenkamp

Fréttastofa Sky birti í dag myndir af suðurafríska spretthlauparanum Oscari Pistorius á skotæfingasvæði þar sem hann mundar sömu byssuna og varð kærustu hans, Reevu Steenkamp, að bana í febrúar í fyrra.

Pistorius er ákærður fyrir morð og hefjast réttarhöld yfir honum í borginni Pretoríu á mánudag. Spretthlauparinn skaut Steenkamp í gegnum lokaða baðherbergishurð á heimili sínu og segist hann hafa haldið að hún væri innbrotsþjófur.

Áður hefur verið fjallað um skotvopnaeign og notkun Pistoriusar en haft hefur verið eftir honum að hann hafi óttast árásir og innbrot í kjölfar morðhótana sem honum hafi borist. Vitað er að hann geymdi skammbyssu undir kodda sínum á nóttunni og var það byssan sem hann notaði hina örlagaríku nótt fyrir rúmu ári.

Í myndbandi á vef Sky má einnig sjá Pistorius skjóta á vatnsmelónu og heyrist rödd sem eignuð er honum segja að melónan sé „ekki jafn mjúk og heili“, á meðan félagar hans fagna.

Reiknað er með að skotvopnanotkun hans verði mikið til umfjöllunar í réttarhöldunum en Pistorius á yfir höfði sér lífstíðarfangelsi verði hann sakfelldur.