Pau Gasol, miðherji Los Angeles Lakers í NBA-körfuboltanum, verður talsmaður Madrídar sem vill halda Ólympíuleikana sumarið 2020. Sports Illustrated greinir frá þessu.
Spánverjinn 33 ára mun koma fyrir Alþjóðaólympíunefndina í september á fundi í Buenos Aires og tala máli höfuðborgar Spánar. Madríd keppir við Tókíó og Istanbúl um heiðurinn að halda leikana.
Gasol, sem orðið hefur NBA-meistari í tvígang með Lakers og fjórum sinnum verið valinn í Stjörnuleikinn, segir að Ólympíuleikarnir gætu hjálpað þjóð sinni sem glímir við mikið atvinnuleysi í kjölfar fjármálahrunsins.
Nefndin mun tilkynna ákvörðun sína þann 7. september í Argentínu.
Gasol á að tryggja Madríd Ólympíuleikana
