Oklahoma vill semja við Fisher

NBA-ferli hins 38 ára gamla Derek Fisher er ekki lokið en Oklahoma Thunder vill fá hann til sín á nýjan leik og eru samningaviðræður í gangi.

Fisher kom til félagsins í mars í fyrra og átti sinn þátt í því að koma liðinu í lokaúrslitin gegn Miami Heat.

Hann fór svo frá félaginu um sumarið. Hann spilaði í níu leikjum með Dallas í vetur en fékk svo að hætta því hann vildi fara til fjölskyldunnar í Los Angeles. Hann stóð sig þó vel hjá Dallas og var með 8,6 stig og 3,6 stoðsendingar að meðaltali í leik.

Fisher skilaði sínu hjá Oklahoma í fyrra og var þess utan sterkur í klefanum og það er eitthvað sem forráðamenn Oklahoma vilja fá aftur.

Líklegt er talið að Fisher taki slaginn en hann vann fimm meistaratitla með Lakers á sínum tíma.