Heimsfriður kýldi mig

Brandon Knight, bakvörður Detroit Pistons, segir að sjálfur Heimsfriðurinn, Metta World Peace, leikmaður LA Lakers, hafi kýlt sig í leik liðanna í gær.

Heimsfriðurinn fékk dæmda á sig óíþróttamannslega villu eftir samskipti sín við Knight og það var Knight ekki sáttur við.

"Það þarf að skoða þetta atvik á myndbandi því það er alveg klárt mál að hann kýldi mig. Þess vegna brást ég svona við," sagði Knight eftir leik.

Heimsfriðurinn vildi ekki gera mikið úr málinu.

"Hann er lítill strákur og var að gera sitt besta til þess að hrista mig af sér. Þetta er harður strákur sem ég veit ekkert um. Hann stóð sig vel. Það er það eina sem ég hef að segja," sagði Metta World Peace.

Þetta var fyrsta óíþróttamannslega villan sem hann fær dæmda á sig í vetur. Heimsfriðurinn var dæmdur í sjö leikja bann á síðustu leiktíð eftir að hann gaf James Harden olnbogaskot.