Bosh gæti spilað með Miami í nótt

Það er ansi mikið undir í nótt þegar leikur fimm hjá Miami Heat og Boston Celtics fer fram. Staðan í einvíginu er jöfn, 2-2. Miami vann fyrstu tvo leikina en Boston vann tvo næstu sem ekki margir áttu von á.

Miami hefur verið án Chris Bosh í leikjunum hingað til en hann hefur reyndar verið frá í þrjár vikur og misst af níu síðustu leikjum liðsins.

Það er ansi mikil pressa á honum að snúa aftur á völlinn þar sem Heat er lent í þessum óvæntu vandræðum gegn Celtics.

Svo gæti farið að hann taki þátt í leiknum í nótt.

"Hann gat æft með okkur í gær en við verðum að meta hann þegar nær dregur leik. Síðustu tveir dagar hafa þó lofað góðu," sagði Erik Spoelstra, þjálfari Miami.

Leikurinn hefst klukkan 00.30 á eftir og er í beinni útsendingu á Stöð 2 Sport.