Kobe sagður hafa farið í aðgerð í Þýskalandi

Los Angeles Times greinir frá því í dag að körfuboltamaðurinn Kobe Bryant hafi farið í aðgerð í Þýskalandi til þess að styrkja á sér hægra hnéð.

Lakers hefur ekki staðfest fréttina en það fór leynt að Kobe hefði skotist til Þýskalands í aðgerðina. LA Times segist hafa fjóra heimildamenn sem staðfesti fréttina. Af hverju Lakers vill endilega halda þessu leyndu kemur ekki fram.

Bryant, sem verður 33 ára í næsta mánuði, hefur verið slæmur í hnénu síðustu ár og hefur farið í þrjár aðgerðir á hnénu frá árinu 2003.

Kobe gat lítið æft síðasta vetur og spilaði síðan minna en oft áður.

Bryant vildi ekkert tjá sig um málið við LA Times.