LeBron James: Mánuður eftir af hatrinu

LeBron James fór á kostum í úrslitum Austudeildarinnar þar sem Miami Heat vann 4-1 sigur á Chicago Bulls og tryggði sér sæti í lokaúrslitunum á móti Dallas. Miami-liðið er nú aðeins fjórum sigrum frá meistaratitlinum sem þeir lofuðu stuðningsmönnum sínum í júlí síðastliðnum.

James var með 25,8 stig, 7,8 fráköst, 6,6 stoðsendingar, 2,4 stolna bolta og 1,8 varin skot að meðaltali í leik í einvíginu en hann lék 45,2 mínútur að meðaltali. Það sem meira er að hann hélt Derrick Rose, besta leikmanni NBA í vetur, í aðeins 6,3 prósent skotnýtingu þegar hann dekkaði hann í einvíginu. Rose hitti aðeins úr 1 af 10 skotum á móti honum í leiknum í nótt.

„Það enginn léttir að vera kominn í úrslitin því við eigum verk eftir að vinna. Við höfum smá tíma til að átta okkur á því sem við höfum afrekað en síðan þurfum við að fara undirbúa okkur fyrir Dallas. Við tökum því ekki sem sjálfsögðum hlut að vinna þennan leik eða vera meistarar í Austudeildinni," sagði LeBron James en hefur mátt þola harða og óvæga gagnrýni síðan að hann setti "ákvörðunina" á svið í beinni sjónvarpsútsendingu fyrir tæpu ári síðan.

„Ég skil alveg að það voru margir ósáttir við að ég færi til Miami. En ég gerði mér líka grein fyrir því að þetta var það besta í stöðunni fyrir mig, það besta fyrir fjölskyldu mína og það besta fyrir mig sem atvinnuíþróttamann. Hvað er 26. í dag. Við eigum eftir mánuð, mánuð eftir að stanslausu hatri en við sjáum síðan til hvað gerist á næsta ári," sagði James en það er ljóst að NBA-meistaratitill myndi breyta miklu fyrir hann og þá meðferð sem hann hefur mátt þola í fjölmiðlum og íþróttahúsum NBA-deildarinnar í vetur.