Ming vill ekki fara frá Houston

Það er talsverð óvissa um framtíð Kínverjans stóra, Yao Ming, en samningur hans við Houston Rockets rennur út í sumar. Sjálfur segist hann vilja vera áfram hjá félaginu. Ming hefur verið mikið meiddur í vetur og tók ekki þátt nema í fimm leikjum með Rockets.

Hann er staddur í heimalandinu þar sem hann hefur verið að fá bót meina sinna. Það á eftir að koma í ljós hvort hann hreinlega geti spilað körfubolta áfram en síðustu ár hafa reynst erfið fyrir risann.

Ef hann nær sér góðum þá mun þjálfari Houston líklega ákveða hvort Ming fái samning. Eins og staða er í dag þá er Houston þjálfaralaust en Rick Adelman yfirgaf svæðið í vikunni.