Stuðningsmenn Portland grýttu Cuban

Hinn skrautlegi eigandi Dallas Mavericks, Mark Cuban, fékk það óþvegið frá stuðningsmönnum Portland Trailblazers í nótt. Eftir að hafa staðið í orðaskiptum við þá var Cuban grýttur.

Cuban er afar líflegur á leikjum Dallas og er vanur því að hrauna yfir dómara leikja liðsins. Hann á það einnig til að rífast við stuðningsmenn andstæðinganna.

Rifrildið í gær endaði með því að Cuban var grýttur og fékk hann aðskotahlut beint í andlitið. Hann slapp þó ómeiddur.

"Ég veit ekki hvað þetta var en aðskotahluturinn fór beint framan í mig," sagði Cuban sem svaraði árásinni með því að ögra áhorfendum og biðja um meira.

Öryggisverðir urðu að bregðast við og setja upp aukna öryggisgæslu í kringum bekk Mavericks það sem eftir lifði leiks.

Dallas er yfir í einvígi liðanna, 2-1.