Ágúst: Kemur ekki á óvart

Ágúst Björgvinsson segir að það sé vel hægt að venjast því að vinna körfuboltaleiki í Keflavík eins og hann gerði með lið sitt, Hamar, í Iceland Express-deild kvenna í kvöld.

„Hamar þurfti að bíða lengi efti fyrsta sigrinum í Keflavík en við erum nú búnar að vinna þrjá leiki af síðustu fjórum hér," sagði Ágúst eftir sigurinn í kvöld.

„Leikurinn í kvöld byrjaði nokkuð jafnt," sagði hann um leikinn. „Þær náðu svo að stinga okkur af og við vorum engan veginn að spila nógu vel. Það var nokkur deyfð yfir mínu liði. Við vorum að hitta illa og frákasta illa. Í rauninni gekk lítið upp en það sem hjálpaði okkur var að stigaskorið var ekki mikið í fyrri hálfleik."

„Fjórði leikhlutinn var svo algerlega okkar eign og við spiluðum virkilega vel í honum."

„Við ræddum um það fyrir fjórða leikhluta að við höfðum engu að tapa. Við vorum ekki búnar að spila vel og fórum því í hann af fullum krafti og sjá hvað það myndi gefa okkur," sagði Ágúst.

Bandaríkjamaðurinn Jaleesa Butler fór fyrir Hamarsliðinu á þessum góða leikkafla. „Hún var engan veginn í takti við leikinn í fyrri hálfleik og var með afleita skotnýtingu. Það gekk í raun ekkert upp hjá henni."

„En það var svo allt annað að sjá til hennar í seinni hálfleik, sérstaklega í fjórða leikhluta þegar hún fór hreinlega hamförum."

Hamar er nú ósigrað eftir fyrstu sjö leikina á tímabilinu en það kemur Ágústi ekki á óvart.

„Við vorum fjórum stigum frá titlinum á síðasta tímabili og það hafa vissulega verið breytingar í hópnum en sú reynsla mun reynast okkur dýrmæt nú. Liðið er alls ekki síðra en í fyrra og því tel ég að gott gengi okkar ætti ekki að koma á óvart."

„Keflavík er með gott lið og er vant því að vinna. Ég geri mér grein fyrir því að þetta er bara einn leikur og baráttan um Íslandsmeistaratitilinn réðst ekki í dag. En við erum á toppnum eins og er og ég er ánægður með það."