Komst norður í snjó, bú­skap og dorg: „Dá­sam­legt“

Tryggvi er alinn upp í Svartárkoti í Bárðardal og frægt er að hann ætlaði sér seint að verða körfuboltamaður. Hugurinn var frekar við búskap þegar tækifærið gafst til að kasta bolta í körfu á Akureyri.

Hann er nú meðal allra bestu körfuboltamanna landsins og leikur með Bilbao á Spáni. Hann segir dýrmætt að hafa fengið auka frí fyrir landsleiki Íslands við Litáen í undankeppni HM. Frí sem hann hafi nýtt til að kíkja á fjölskylduna í Bárðardal.

„Í þetta skiptið var ég svo heppinn að komast heim í tvo daga. Ég fékk að fara á Norðurlandið, í snjóinn, ísinn, kindurnar og að dorga smá. Það var alveg dásamlegt. Það er alltaf gott að komast aðeins heim og brjóta upp hversdagsleikann úti,“ segir Tryggvi í samtali við Sýn.

„Það er frábært að hitta fólkið mitt, knúsa þá sem skipta mig máli og að borða matinn sem er gerður heima sem maður saknar svolítið.“

Vilja verja Evróputitilinn

Annars gengur lífið sinn vanagang í Baskalandi þar sem liði Tryggva, Bilbao Basket, hefur gengið betur í ár en í fyrra heima fyrir.

„Það gengur frekar vel, bæði í Evrópudeildinni og spænsku deildinni. Það er gaman að horfa svolítið upp á við í staðinn fyrir á þá fyrir neðan. Það er gaman og gengur vel, það er góður hópur af strákum þar. Ég er mjög ánægður,“ segir Tryggvi.

Liðið vann Evrópubikartitil á síðasta ári og er nú komið í 8-liða úrslit keppninnar eftir fína frammistöðu í vetur. Ekki stendur annað til en að verja titilinn.

„Við erum í mjög góðri stöðu til þess. Núna eru þessi tveggja leikja umspil fram undan. Þá er mikilvægt að vera tilbúinn í hvern leik og taka á því í hvert skipti. Það er náttúrulega eina vitið að ætla að verja þennan titil og lyfta þessum bikar aftur,“ segir Tryggvi sem kemur í toppstandi til leiks.

Klár í 80 mínútur af barningi

„Persónulega er líkaminn minn bara upp á tíu og ég er til í þessa bardagaleiki sem eru fram undan,“ segir Tryggvi. Mikið mætt á honum í landsleikjum Íslands þar sem hann hefur hæð og eiginleika sem aðrir í liðinu búa ekki yfir.

Hann hefur á köflum spilað hátt í 40 mínútur í nánast hverjum einasta leik liðsins. Er hann klár í 80 mínútur gegn Litáum í kvöld og á mánudag?

„Já, já. Við gerum það sem við þurfum að gera. Við ætlum okkur að reyna að ná í sigur eða tvo. Það þýðir bara að hver einasta mínúta sem þarf að lemjast aðeins inni á þessum velli er það bara heiður,“

Mikilvægir leikir í jöfnum riðli

Einstök staða er í riðli Íslands, þar sem öll fjögur liðin eru jöfn að stigum, með þrjú talsins. Ísland fékk tvö stig fyrir frábæran útisigur á Ítalíu í fyrsta leik en fylgdi því eftir með slæmu tapi fyrir Bretum hér heima.

Litáen marði Breta með eins stigs mun í fyrsta leik en tapaði svo með eins stigs mun fyrir Ítölum. Ísland mætir nú Litáen heima og heiman í komandi leikjum. Í Laugardalshöll á föstudag og ytra á mánudag.

Leikirnir tveir við Litáen eru því gríðarmikilvægir.

„Þeir eru risastórir. Ef við ætlum að komast á HM, það á mikið eftir að gerast þangað til, en við erum í fínni stöðu eftir góðan sigur á Ítalíu. Ef allt fellur með okkur munu Bretarnir detta út svo sá ósigur skipti ekki miklu máli á endanum. En í fyrsta lagi er þetta leikur á föstudaginn og svo á aftur mánudaginn. Við þurfum bara fullan fókus og ná í annan sigur, ná í eins marga sigra og hægt er fyrir næsta riðil,“

„Það eru sterkar og stórar þjóðir sem eiga heima á HM þarna en við ætlum að reyna að troða okkur þar inn,“ segir Tryggvi.

Viðtalið má sjá í spilaranum efst.