Saga Elvars er ó­trú­leg

Ísland vann stórkostlegan sigur á Litháen á föstudagskvöldið er liðið vann eins stigs sigur 86-85 eftir flautukörfu frá Elvari Má Friðrikssyni. Ísland var 19 stigum undir þegar tæplega sex mínútur voru eftir af leiknum en ótrúleg frammistaða Elvars skilaði stigunum tveimur í hús. Elvar með 34 stig í leiknum. Á mánudaginn mættust liðin aftur og þá vann Litháen 17 stiga sigur nokkuð þægilega. Ísland er í þriðja sæti riðilsins með sex stig, jafnmörg stig og Litháar og einu stigi á eftir toppliði Ítala. Bretar reka lestina með fimm stig. Ísland mætir Bretum og Ítölum í næsta glugga í júlí. Þrjú efstu liðin fara áfram í næsta undankeppnisfasa.

„Ég held að það að splitta leikjunum gegn Litháum séu bara mjög góð úrslit og meira en ásættanleg. Ég verð að viðurkenna það, ég var á leiknum og ég var eiginlega bara búinn að gefa upp alla von. Tryggvi var farinn út af og við vorum 19 stigum undir. Mér fannst eins og það væri verið að kasta inn handklæðinu. Svo koma bara Hilmar og Tóti inn og við með lítið line-up inni á og við byrjum að ná þessu til baka. Ég hélt að við yrðum í góðum leik á heimavelli. En eins og Litháar voru og eru, þá vissi maður að þetta yrði strögl. Þetta verður lengi í minnum, þessi leikur. Ég held að við munum muna þennan lengi.“

Eins og áður segir var Elvar Már einstakur í leiknum en man Hlynur eftir svona frammistöðu hjá íslenskum landsliðsmanni?

„Ég þyrfti nú að fara að grafa sko og er svo sem búinn að gleyma mörgum leikjum. Þetta var eitthvað mjög bara algjörlega stórkostlegt og svo er saga Elvars kannski eitthvað sem þið bara skrifið einhvern tímann seinna. Hún er alveg stórmerkileg. Hvernig hann hefur vaxið. Það er í raun og veru auðvitað fínn leikmaður og góður leikmaður. Hann fer 25 ára til Svíþjóðar og síðan er það bara tröppugangur. Hann er bara fyrirmynd fyrir ungt fólk. Hvernig einhvern veginn á að haga sínum ferli, hvernig það á ekki að gefast upp. Hann er orðinn í dag leikmaðurinn á mjög háu stigi. Þetta var algjörlega ótrúlegt. Að fylgjast með honum þarna. Allt bara allt frá þessum körfum, bara í fagnið og ljósmyndina. Þetta var allt skrifað eins og þú átt að gera það.“