Sex málum hefur verið vísað til FME

Frá því lög um gjaldeyrishöft tóku gildi í lok nóvember síðastliðins hefur sex málum verið vísað til rannsóknar hjá Fjármálaeftirlitinu (FME) vegna gruns um brot á þeim.

Í svari Fjármálaeftirlitsins við fyrirspurn Markaðarins kemur fram að málin séu enn til skoðunar hjá eftirlitinu.

„Rétt er að taka fram að reglur um íslenska gjaldmiðilinn og gjaldeyrismál heyra undir Seðlabanka Íslands. Í lögum um gjaldeyrismál númer 87/1992, samanber lög númer 134/2008 kemur fram að vakni grunur um brot gegn lögunum skuli Seðlabanki Íslands, eða eftir atvikum lögreglan, tilkynna Fjármálaeftirlitinu um það," segir í svari FME.

Tekið er fram að ef slíkar rannsóknir eftirlitsins leiði til þess að grunur um brot sé staðfestur geti slíkum málum lokið hjá Fjármálaeftirlitinu með stjórnvaldssektum, með sátt eða með því að Fjármálaeftirlitið vísi málum til lögreglu, eða eftir atvikum til sérstaks saksóknara.

Áréttað er að brot gegn lögunum og reglum settum á grundvelli þeirra sæti aðeins opinberri rannsókn að undangenginni kæru FME til lögreglu.

Í lögunum kemur fram að rúmur refsirammi sé vegna brota gegn þeim. Þannig geta sektir sem lagðar eru á einstaklinga numið frá 10 þúsund krónum til 20 milljóna króna. Sektir á lögaðila geta svo numið frá 50 þúsund krónum til 75 milljóna króna.

„Við ákvörðun sekta skal meðal annars tekið tillit til alvarleika brots, hvað það hefur staðið lengi, samstarfsvilja hins brotlega aðila og hvort um ítrekað brot er að ræða. Ákvarðanir um stjórnvaldssektir skulu teknar af stjórn Fjármálaeftirlitsins og eru þær aðfararhæfar," segir í lögunum, en sektirnar renna í ríkissjóð.

Greint var frá því í Markaðnum fyrir viku að enn væru brestir í gjaldeyrishöftunum sem hér hefur verið komið á, þrátt fyrir að reglur um gjaldeyrisviðskipti hafi verið hertar í byrjun þessa mánaðar. Heimildir blaðsins herma að útflytjendur hafi í einhverjum tilvikum samið beint við erlenda eigendur krónubréfa um eigendaskipti á bréfunum. Opinber gögn um að eigendaskipti hafi orðið á krónubréfum liggja þó ekki fyrir, en samkvæmt upplýsingum frá Seðlabankanum eru slík viðskipti óheimil.

Svein Harald Øygard seðlabankastjóri upplýsti á ársfundi bankans síðastliðinn föstudag að Seðlabankinn hafi nú hert enn frekar eftirlit sitt með því að farið sé að settum reglum um gjaldeyrisviðskipti. Unnið sé að því að koma á fót í bankanum nýrri eftirlitseiningu og verið sé að breyta reglum á þann veg að bönkum verði skylt að tilkynna um meint óleyfileg viðskipti.

Jóhanna Sigurðardóttir forsætisráðherra hafði einnig orð á mikilvægi gjaldeyrishaftanna í ræðu sinni á ársfundi bankans og kvað lykilatriði að ná stöðugleika á gjaldeyrismarkaði. „Það er því ófyrirgefanlegt þegar fyrirtæki og einstaklingar fara á svig við þær reglur og þau gjaldeyrishöft sem við höfum neyðst til þess að setja," sagði hún.