Tafirnar trufla ekki Icelandair

Icelandair Group horfir enn til tækifæra í flugvélaviðskiptum. Þar eru allir framleiðendur undir. Nærri þriggja ára töf er á Dreamliner-vélum.

Bágt ástand á alþjóðlegum fjármálamörkuðum breytir engu um fyrirætlanir Icelandair hvað varðar kaup á nýjum Boeing 787 „Dreamliner" þotum, að sögn Sigþórs Einarssonar, aðstoðarforstjóra félagsins. Tafir hafa orðið á framleiðslu vélanna, þennig að tvær þotur sem afhenda átti Icelandair á næsta ári verða að óbreyttu ekki afhentar fyrr en síðla árs 2012 og snemma árs 2013.

Icelandair Group hefur pantað fimm þotur þessarar gerðar og á kauprétt á fleirum. „Við höfum fulla trú á þessari vél. En núna árar þannig að tafirnar hjá Boeing koma sér kannski ekkert illa fyrir þau félög sem áttu að fá fyrstu vélarnar hjá Boeing," segir Sigþór og kveðst gera ráð fyrir að þegar kemur að afhendingu nýju þotnanna til Icelandair verði markaðurinn orðinn mun eðlilegri. „Almennt finnum við bullandi áhuga í fluggeiranum á því að taka þessa vél, jafnvel þótt einhverjir hafi helst úr lestinni vegna vandamála dagsins í dag."

Icelandair Group hafði gert samning um að leigja út fyrstu vélina sem afhenda átti og segir Sigþór töfina vissulega hafa sett ákveðið strik í þann reikning. „En við leysum bara úr því með Boeing og ekkert hik er á okkur með þessar vélar. Þetta eru hörkuvélar og eiga eftir að skila samstæðunni sínu með einhverjum hætti."

Enn hefur hins vegar ekki verið ákveðið til hvaða verka nýju þotunum verður skipað eða hvað verður gert við þær eftir afhendingu. „Það hefur ekkert þrýst á um ákvörðun í þeim efnum vegna tafanna. Svo er líka aldrei að vita hver staðan verður eftir tvö ár. Þá getur eins verið að okkur vanti einmitt svona vélar á einhverjar flugleiðir."

Í flugiðnaði er enda gert ráð fyrir miklum vexti áfram og segir Sigþór að Icelandair Group, líkt og önnur félög, reikni með að flugumferð haldi áfram að aukast.

Fram kom á kynningu Airbus í Hamborg í byrjun síðustu viku að gert væri ráð fyrir að flugumferð tvöfaldist á hverjum 15 árum. „Ég fór einmitt yfir þessar tölur um daginn. Hægt er að horfa á tvo þætti í þessum vexti, annars vegar skammtíma- og hins vegar langtímasýn. Til skemmri tíma eru mjög miklar sveiflur og við erum að fara í gegnum eina slíka núna, niðursveiflu á eftir rosalegri uppsveiflu síðustu ár. En þegar horft er yfir lengri tíma sést að það er tvöföldun á hverjum fimmtán árum." Sigþór áréttar um leið að þótt vöxturinn virðist gífurlegur, þá þurfi ekki svo ýkja mikinn vöxt á ári hverju til að ná þessum tölum, líkast til fjögur til sex prósent á ári. „Og sá vöxtur er ekki fjarri lagi því í löndum þar landsframleiðsla á haus ekki mjög mikil núna þarf vöxtur ekki að aukast mikið til að ferðalög margfaldist. Og stór hluti heimsins er enn í þessari stöðu og nægir þar að nefna Indland og Kína."

Sigþór segir Icelandair Group horfa vítt á möguleikana sem í boði eru hvað varðar flugvélakost í rekstrinum og loki þar ekki á neina möguleika. Samstæðan notar mestanpart Boeing vélar, en einnig Airbus í fraktflutningum hjá dótturfélaginu Latcharter í Lettlandi. Þá segist hann tæpast telja að Evrópusambandsaðild myndi hafa áhrif á það hvar félagið kaupir vélar. „Ódýrar Airbus vélar yrðu alveg örugglega ekki hluti af aðildarsamningi," gantast hann með, en viðurkennir um leið að dregnar hafi verið upp myndir af því hverju það myndi breyta í rekstrinum að nota annan flugvélakost. „Helst myndi það breyta fjármálaumhverfinu, því viðskiptin yrðu þá að mestu í evrum en ekki dollurum eins og nú, en það myndi ekki beint hafa áhrif á viðskiptin. Við höfum hins vegar ekki horfið frá því að við teljum að fyrirtæki eins og okkar hafi töluverð tækifæri í viðskiptum með flugvélar sem hliðarbúgrein. Í þeim efnum höldum við opnum línum á alla staði."