Peningar á leiðinni

Svo gæti farið að allt að 192 milljónir evra, jafnvirði um 27,5 milljarða króna, hið minnsta falli í skaut skilanefndar Straums vegna eignasölu bankans upp á síðkastið, samkvæmt heimildum Markaðarins.

Þetta er meðal annars vegna sölu bankans á pólska símafyrirtækinu Netia, sem gekk í gegn á föstudag í síðust viku og skilar sér til bankans í dag. Allt er tilbúið fyrir sölu á bresku ferðaskrifstofunni XL Leisure Group en áætlað söluandvirði, sem von er á að skili sér eftir næstu mánaðamóti, nemi rúmum 60 milljónum evra. Þá er áætlað að kanadíska frysti- og kælivörufyrirtækið Versacold, sem hefur verið í söluferli síðan á fyrrihluta síðasta árs, geti skilað hundrað milljónum evra í búið.

Skilanefnd Fjármálaeftirlitsins tók lyklavöldin í fjárfestingabankanum á mánudagsmorgun eftir að Seðlabankinn neitaði honum um lán upp á átján milljónir evra, um 2,5 milljarða króna, til að mæta greiðslu á láni upp á 33 milljónir evra sem féll á gjalddaga á mánudag. Bankinn lánaði Straumi 133 milljónir evra, tæpa 19 milljarða króna á núvirði, í desember í fyrra.

Gylfi Magnússon viðskiptaráðherra sagði í samtali við Fréttablaðið í gær að stjórnendum bankans hafi átt að vera ljóst hvert stefndi. Hefði Fjármálaeftirlitið ekki gripið í taumana hefði breskir kollegar þeirra gert það.

Eins og fram kom í Fréttablaðinu í gær var lán Straums afar lítið í samanburði við þá gjalddaga sem framundan eru. Bankinn á að greiða 329 milljónir evra á þessu ári en 412 milljónir á því næsta. Þar af eru tæpar 290 milljónir evra á gjaldaga á fyrri hluta þessa árs. Fram hefur komið að bankinn ætlaði að greiða erlendar skuldir með sölu erlendra eigna.

Alþjóðlega matsfyrirtækið Fitch felldi lánshæfiseinkunni Straums úr B í D, en það merkir að bankinn er gjaldþrota en fyrirtækið telur, að ekki sé hægt að reiða sig á að kröfur bankans fáist greiddar.

Ekki náðist í Gylfa Magnússon þegar eftir því var leitað í gær. Gunnar Haraldsson, stjórnarformaður Fjármálaeftirlitsins, sagði að verið væri að fara yfir málið.