Houston og Utah mætast í oddaleik

Einvígi Houston Rockets og Utah Jazz í úrslitakeppni NBA hefur verið æsispennandi og í nótt knúði Utah fram oddaleik í Houston á laugardagskvöldið með 94-82 sigri í Salt Lake City. Staðan er því jöfn 3-3 í einvíginu og hafa allir leikir í seríunni til þessa unnist á heimavelli.

Carlos Boozer skoraði 22 stig og hirti 9 fráköst fyrir Utah, Mehmet Okur skoraði 19 stig og hirti 9 fráköst, Deron Williams skoraði 15 stig og gaf 8 stoðsendingar og þá munaði mikið um óvænt framlag Andrei Kirilenko sem hafði verið heillum horfinn lengst af í einvíginu. Hann skoraði 14 stig og varði 5 skot - þar af nokkur þeirra frá Yao Ming á lykilaugnablikum.

Tracy McGrady var stigahæstur hjá Houston með 26 stig og hirti 10 fráköst. Yao Ming skoraði 25 stig, en hirti aðeins 6 fráköst og tapaði 8 boltum. Rafer Alston skoraði 13 stig fyrir Houston en enginn annar leikmaður skoraði meira en 6 stig.